Tuesday, November 15, 2011

العسكرى الاخضر


ما انا قلتلك يابنى لا تلاعب العسكرى
ولا تخلى العسكرى يلاعبك
ما حينوبك غير صداع سطوته وتعب بدنك
لعبة كبار ملاعين سوس فى الاعمدة بتنخر
حالفين يجيبوا سقفها ولجثتك تحفر
وكل شئ بالقدر وقضاء ربنا وقدره
مش انت ابو الرجال الثورجى اللى حتجيبلنا دابره
اشرب بقى يابنى وحتدفع المشاريب وبرده مش قده

وعجبى

Saturday, October 8, 2011

رباعية


انطق وقول ياجدع من الكلمة ما تخافشى

لا الحق كان فيه عيب وأن قاله ما تقولشى

انطق واية صايبك يعنى ما حتمتشى

وان عسكر العسكرى وساء الهبل فيها قوله لا متسؤشى

وعجبى

Wednesday, June 1, 2011

كلمة ونص


ما تلومنيش لما أدور بين العقول على الفكرة
وأنبش وأعدل فى فكر الغرب قبليكم
ماهو مش يكون عقلك قدم وأنحرفت فيه السنن
...وعلى أختيارى تضحك تقول يارب يهديكم
ما هو لو اراد ربنا يكون فكرنا واحد
كان وحد الأفكار ولا كان يكون نواحينا ونواحيكم
ما تصلى بينا على النبى من غير كتر كلام ولا تطويل
ما هو لما الطب جاب الدوا قالوا عليه خرافات ربنا يشفينا ويشفيكم

وعجبــــــــــــــــــــــــــــــــــــــــــــــــــــــــــــــــــــــــــــــــــــى

Thursday, April 21, 2011

سألونى

أتمنى ان اكون استطعت تجسيد شئ منى


سألونى مين أنت


قلتلهم صغير أنا فى سنى


لكن عجوز شابت أحاسيسى


وبالرغم من الشيبة


وطقطقت الشعور البيض


فاتح أنا شيشى وفاتح ترابيسى


قلتلهم أنا أنسان


وحيد أنا فى حالى


سعادتى جوايا وأحزانى جوايا


وليد ما شاف النور


أفرح يمطر سحاب جوفى


ويرقص قلبى ويايا


أحزن يثور قلبى ببركان خوف


وسيل من الدمع ماله نهاية


ماليش فى الدنيا غير نفسى


وكان نفسى يكون ليا بقربى حبيب


لكن مليت دموع عينهم


لكن مليت الرعشة فى مناديلهم


فى يوم لحظة ما أودعهم


أصلى كتير الحيرة والغربة


حتى وأنا مابين ناسى


تنام الناس


وأسهر وحيد انا وقمرى


نكلم بعض بالأحساس


أغمض عينى


أشوفه لما يحكيلى ويشكيلى من الوحدة


برغم النور أشوفه يتوه بين السحاب


أطيب خاطره بالكلمة


دة اللى مابينى وبينه دوا


وعلى شفايف الهوا النادية


بيبكى الناى بعزف جميل


على حالنا


ونشد ترحلنا


وألقى الحب فى طريقى


أخاف منه بعيد أجرى


ويملك خوفى وجدانى


أخاف لينكسر قلبى


وتزيد عليا أحزانى


أخاف ليخرم الهوا ودنى


لقلب بحلق الحب يوعدنى


وفى الاخر يقوم يهرب ويجرحنى


ما ينوبنى منه غير وجعى


ودمى يسيل


أنا يا سادة سجين خوفى


وأفكارى وأيامى


سجين ندمى وأحلامى


لكن سجنى ما منعش ان حبى يزيد


Sunday, April 10, 2011

عشش فى قلبى

يا طير يا طاير فى السما

قرب هنا

عشش فى قلبى

نزل على قلبى السلام

وأبعت منه السلام

قرب ما بنا اللقى

زاد لشتياق


عشش فى قلبى

أنقل نسمات الهوا

أرسم بريشك شريان

نهر الاحبة

وأكتب على جداره حياة


عشش فى قلبى وطير

أحكى لأسراب الطيور

عن ضفتين فيهم بيوت

وكل بيت جواه حبيب

ولسة باقى من البيوت

لمن يريد


عشش فى قلبى

وألمس فى ثناياه الخضار

قرب وشوف الزرع طارح

شم طميه

ولو لقيت فى طمى زيه

عشش هناك

بس ساعتها أمانة أفتكرنى

وأحكى عنى

وقول زمان عششت

فى قلب أخضر

لما كان قلب

العباد بيدق موت

رفض قلبه يدق ممات

Wednesday, April 6, 2011

شخابيط

كل حد يفهمها بطريقته


شخابيط على الورقة



مين يفهم المكنون



واللى فهم شخبطة



يقولوا ال مجنون



وعجبى

Monday, April 4, 2011

مدونين على الفيس

دة لينك جروب المدونين على الفيس ياريت تنشروه وتشاركونا http://www.facebook.com/#!/home.php?sk=group_150308615029590

Wednesday, March 9, 2011

أصبح كذالك


أصبح كذالك
هدوا المساجد والكنايس
وسكتت أجراس المسيح
وصوت بلال على المأذنة
أصبح جريح
والأعتقاد ساد العقول
واضح صريح
البركة حلت من الصليب
او من زيارتك للضريح
فى شئ غريب فى شئ عجيب
والوضع أصبح مش مريح
كل الملامح اتغيرت
خير القلوب أصبح شحيح
والمحبوبين المرغوبين
أكبر مثال للمرجلة والأنضباط
هم اللى كلامهم أبيح
والطيب اللى طباعه
الأحترام ينداس علية
يصبح دبيح
ماشى بدور فى الوشوش
زهور دبلانة على الشجر
سيف الأسى قتل البشوش
سمة الخيانة بقت مديح
الكل تايه فى المكان
والوضع أصبح شقلبان
تصرخ تصيح
الحق أهه
باب الضلال أصبح فسيح
الكل ماشى محدش
حتى حاول يسمعك
تحس بضعف وأنك غلط
وهم فى الوضع الصحيح
يا أهل الهلال يا أهل الصليب
هدوا المساجد والكنايس
وسكتت أجراس المسيح
وصوت بلال على المأذنة
أصبح جريح
والوضع أصبح مش مريح
الوضع أصبح مش مريح

Thursday, March 3, 2011

حكاية شعب



على ضفاف نهر الحياة
دبت جموع الخلق
تلملم تاريخ السنين
تغرز بذور الحق
تسقى البذور دمها
خرجت زهور من الشق
غزلت هلالها فى صليبها
ماتلقى بينهم فرق
هزوا عروش الظلم
وزلزلوا الطغيان
فتحوا زنازين القلوب
وكسروا القضبان
ليل الظلم أنجلى
على أيد الشبان
نزعوا بقوة الحرية
نور النهار أهه بان
أجساد فى روح واحدة
ووحدوا الأديان
تسأل ديانتك أية
فى أى مكان كان
بكل فخر يقول
ديانتى مصرى وجنسيتى أنسان

Tuesday, February 22, 2011

لماذا العلمانية


بسم الله والحمد لله والصلاة والسلام على رسول الله انا حابب اتكلم بعيد عن القوافى حابب أكتب كموضوع بعد ما خلصت احداث الثورة والمشاركات والمظاهرات بجد كانت أيام مش حتتنسى خصوصا اخر جمعة اللى تم فيها التنحى ساعتها كنت بصلى المغرب بجانب قصر رأس التين فى الاسكندرية وما ان سمعت الافراح بالخارج فبكيت وانا مازالت بالصلاة بكاء لم أبكيه لفرح او حزن قبل ذالك المهم
هل كدة أحنا دورنا خلاص ولا لازم نوعى الناس ونختار بقى نظامنا انا شايف ان لازم نعمل نوع من التوعية السياسية ونختار حياتنا خصوصا ان شعب مصر بيعانى من العقم السياسى فى الفترة الاخيرة لحد النهاردة قريت كتب عن الاشتراكية والرأس مالية وألخ وجدت ان أفضل نظام هو العلمانية لقيادة المرحلة المقبلة بس العلمانية اللى أقصدها مختلفة شوية تقدر تقول مهجنة أزاى النظام العلمانى فيما هو معروف فصل الدين عن الدولة طيب انا طالب اول شئ ضيف ليها كلمة الليبرالية تبقى العلمانية الليبرالية اشمعنى النظام دة عشان مصر مخنوقة سياسيا ودينيا وثقافيا كل شئ تقدر تقوله محتاج انك تفتح البوابة على أخرها ومافيش نظام بيتيح دة الا العلمانية ناس حتقولى طب والاسلام ياعم الحج حاضر ياسيدى أنا قلت ان العلمانية اللى عايزين نطبقها مهجنة بحيث اننا حنحافظ على المادة التانية فى الدستور ونبتدى نطبق الشريعة فعلا لما العلمانية تؤهل للأسلام ازاى لما نوصل لدرجة وعى معين من السياسة ندمج الدين والدولة لما نوصل ان الشعب كله لاقى ياكل نطبق السرقة قطع الأيدى لما نوصل لفهم الدين والتسامح مع الديانات الاخرى نقيم شرع الله وهكذا يبقى نظامنا هو النظام العلمانية الليبرالية المتدرجة بحيث كل ما نوصل لمرحلة وعى معينة بالتدرج ننقل السلطة للأسلامية
عشان كدة شايف فى المرحلة المقبلة العلمانية هى الحل

Friday, February 18, 2011

فرعون مصر

القصيدة دى كنت كتبها من شهر تقريبا وموجودة فى المواضيع القديمة وانا بقلب كدة لقيتها وكأن قلمى كان حاسس عنى فا حبيت أعيد كتبتها هنا تانى

أنا موسى

أكثرت فسادا فى الأرض وزرعت الشر

وسقيت فسادك بدموع العين المنهمر

وحصدت الظلم بأيدينا ورسمت للموت طريقا مختصر

ورميت بنا فى غيباته وعلمت بأن أخره الموت ولا مفر

ولكن خابت نواياك وضل من عينك البصر

فصارعنا موت مصطنع فصنع بأنفسنا الدرر

فرعون مصر أليك بذاك الخبر

أنا موسى هذا الزمان ألقى ألى بالنظر

مرسل بأمر كتاب الله وبأمر الله قد فاح منى العطر

هذه عصى موسى فى يدى شعب قد مل الذل والفقر

وها نور موسى على كفى قرأن دستور ضيه كالقمر

فرعون مصر أنا موسى ومن عصانى قد كفر

رسالتى كفاك بمصر الضرر أرحل بسلم وقد أعذر من نذر

وأعلم بأنه مهما بك طال العمر

الله قادر أن يأخذك أخذ عزيز مقتدر

فأرحل بسلم من مصر وقد أعذر من نذر

Tuesday, February 8, 2011

فى الميدان

أولا أبدأ بسم الله وأدعوا الله ان يرحم شهدائنا ويسكنهم الفردوس الاعلى
ثانيا الف مبروك علينا ثورة مصر ثورة الاصلاح ولأول مرة بحس ان فى أمل وان كل كلمة اتكتبت من كل واحد فى حب مصر ما ضعتش هدر الحمد لله لكن هى كانت مرحلة السكون ما قبل العاصفة

فى الميدان

بنت واقفة

لابسة طرحة

وبالمصارحة قالت

أرحل

فى الميدان

شاب واقف

عينه صاحية

وكل كلمة

وكل صرخة

قالك أرحل

تبقى ترحل

من غير مجادلة

ولا مبادلة

فى المناصب

والأماكن والوشوش

أصل كل دة هجايص

وكل دة أصبح فشوش

شباب صحيح

لكنه واعى

دة نور ظهوره

أستجبة لألف داعى

قال يارب

أنه يرحل

تبقى ترحل

فى الميدان

قالوا عملا

مأجورين

وألف نوع من

الأجندات ملونين

قالوا أشى

أمريكانى وأسرائيلى وأيرانى

ونسيوا يقولوا

أن الأجندة

ورقها مصرى

ولونها زهرى

مصبوغة بدم سايل

فى الشوارع والحوارى

من رصاص

أبن الحرام

وياللى خايف

ع النظام

ع الأمان

ياللى خايف

تبقى فوضى

يوم رحيل

هو من أمتى

الكلام دة

هو من امتى

النظام كان حماية

وكان ملاذ

هو من أمتى

الحرامى كان

فى صفك أنحياز

هو جوعك

هو فقرك

لما ذلك

كان أمان

كان حماية

فى يوم لعرضك

كان حمى فى يوم كرامتك

ولا كان هو الهوان

يا أخويا

فى المواطنة

مصر حرة

مصر باقية

وأحنا فى عداد الزوال

عايز تأيد

روح وأيد

وأرفع شعار

مصر مبارك

مصر الاستقرار

معاة

وأنكر جميل شعب

كامل عوده ثابت

وحمله من حمل الجبال

لكن أحنا

فى الميدان

مصنع رجال

هم دول

بالنسبة لينا الأمان

فى الميدان