Monday, March 9, 2009

حياتى

السلام عليكم انا بس حبيت انزل بوست يكون ليا يمكن يفيد فى المرحلة اللى جاية
ما فيش داعى بقى انكم تتعاملو مع حد مش عارفينه

انا اسمى احمد عادل
محافظة الاسكندرية العصافرة
طالب بكلية الاداب قسم التاريخ شعبة عامة
الفرقة التالتة

اللقب المتداول فى الكلية

احمد موسولينى

ومش عارف لية مع انى مش شابهه خالص وطيب اوى والله

المهم انتم عائلتى التانية ودى كدة حياتى وبكل صدق
تحياتى


معلش انى ما نزلتش حاجة عشان الجريدة بس عشان مخنوق وتعبان شوية لكنى ما زلت ابتسم
البوست اللى جاى نكمل مناقشة

حياتى
انا
ومين انا
ومين يقدر
يقول انا
ليه هنا
عيل صغير
زى الكل
طفل بيحلم
بالسعادة والهنا
عشت حياة
من ذل لذل
تبدأ مشاكل
ومالكش ذنب
ومافيش قدامك
غير انك
تقعد على
جنب
تبكى عيونك
من بيت لبيت
وما يزيدك
الا التعقيد
اشمعنة فلان
وليه يارب
اختارتنى اكون
ذليل
وليه ياربى
دايما اكون
انا العليل
وكل ما انجح
وأحاول افرح
وارجعلهم واقولهم
يقولولى
اية المشكلة
ما الكل
زيك زيهم
وارجع أأنس
وحدتى
احساس غريب
انك تلاقى
اللى المفروض
يحبك
تحس انه
بيكرهك
والغريب عنك
ياخدك يبوسك
يحضنك
وارجع انا
زى ما انا
مش طالب
بس الا يسكتوا
ويستجيب ربنا
على رغم
كل الظروف
تظهر بوادر
شمس صابحة
بنورها تضمنى
ترسم على
طريقى الحروف
واكون انا
بفضلها
شافت سنينى
فى عمرها
ضحت عشانى
ودلوقتى
دة حقها
ظروف جديدة
بتنفرض
وانا من
جديد بتولد
كأنى ليها
بتوهب
اصبحت ليها
احسن من
منجم دهب
من غير مبالغة
ولا عجب
وبقيت انا
وعرفت لية
انا هنا
وبكل صدق
دة انا

تحياتى
احمد الشاعر
www.elsha3er1.blogspot.com

Saturday, March 7, 2009

جريدة المدونين 2

نحن ليس اقل منهم


انا مش عارف ابتدى منين بس بجد انا مخنوق وتعبان اوى بس ما حبش اقف فى نص الطريق الحمد لله فى مجموعة كويسة وافقت على الفكرة وكنت بتكلم انا والمدون محمد غالية بجد اخ وحبيبى ربنا يكرمه وعرضت عليه حاجات وتوصل معايا لحلول وكدة احنا يا جماعة عشان نتجنب هجوم اللى حصل فى الوثيقة قدامنا حلين اما نمشى بطريقة الجزء يصنع الكل وبكدة يبقى اول ما خلص النظام نبتدى على طول ونحط اى حد قدام الامر الواقع واللى عايز يبقى معانا اهلا وسهلا اما ان احنا نبتدى نعرض الفكرة فى مدونات لا يزيد معلقيها عن 100 تعليق ولو اقل يبقى احسن بس دى حتاخد وقت كبير وانا ما برجحهاش فا انتم ايه رأيكم نمشى بمبدأ الجزء يصنع الكل انا مع اى حاجة انتم عايزنها
ثانيا الناس اللى حتكتب واللى اتذكر اسمهم
محاسن/اكون او لا اكون/د..عمر فاروق/طموحة مملوحة /سارة نجاتى /وكيارا حتكتب فى التاريخ والشخصيات
قلنا ممكن يحصل مشاكل وناس تقول اشمعنة فا نقرب المسافة الاول احنا حنعمل سبع مجموعات عدد كل مجموعة حنقوله لما نعرف الابواب اللى انتم عايزين تكتبه فيها وكل مجموعة حتكتب يوم فى الاسبوع فا تبقى المجلة يومية وكل مجموعة بتكتب يوم واحد فى الاسبوع يارب اكون عرفت اوصل قصدى ايه المهم كل واحد من الناس اللى احنا اخترناه اللى هم الاساس حيرأس مجموعة او حيعمل مجموعة مثال / محاسن مثلا على راس المجموعة الاولى وحتكتب كل يوم جمعة فلان على المجموعة التانية وبتكتب كل يوم سبت وهكذا
وبرده اللى عنده حاجة يوضحها وياريت بقى تقولو حتبقى الابواب اية عشان اظبط المدونة على الابواب
يعنى مثلا رياضة / من واقع الحياة/ دين/ رومانسى/ سياسى /مواضيع عامة /مواضيع وشخصيات تاريخية /وهكذا بس نفسى منكم من مشاركة ايجابية بجد انا تعبان اوى مش قادر افكر انا حاسس انى مخى واقف تماما فا فكرو معايا وشاركوا بعضيكم فى الرأى وردو على وجهات نظر بعض كأن مدونتى مدونتكم بالظبط وكأنكم بتردو على تعليقات جاية ليكم اوك اتفقنا
وتذكرو دائما اننا اسرة تستحق التجمع
وبلاش يا جماعة حكاية حزب دى دلوقتى واخد بالك يا محمدين ما فيش حزب ولا رابطة مش اكتر من جريدة
اة صحيح ابتدو شوفو اسم للجريدة وشعار لها واتفقو وانا معاكم


تحياتى للجميع
احمد الشاعر