Tuesday, February 8, 2011

فى الميدان

أولا أبدأ بسم الله وأدعوا الله ان يرحم شهدائنا ويسكنهم الفردوس الاعلى
ثانيا الف مبروك علينا ثورة مصر ثورة الاصلاح ولأول مرة بحس ان فى أمل وان كل كلمة اتكتبت من كل واحد فى حب مصر ما ضعتش هدر الحمد لله لكن هى كانت مرحلة السكون ما قبل العاصفة

فى الميدان

بنت واقفة

لابسة طرحة

وبالمصارحة قالت

أرحل

فى الميدان

شاب واقف

عينه صاحية

وكل كلمة

وكل صرخة

قالك أرحل

تبقى ترحل

من غير مجادلة

ولا مبادلة

فى المناصب

والأماكن والوشوش

أصل كل دة هجايص

وكل دة أصبح فشوش

شباب صحيح

لكنه واعى

دة نور ظهوره

أستجبة لألف داعى

قال يارب

أنه يرحل

تبقى ترحل

فى الميدان

قالوا عملا

مأجورين

وألف نوع من

الأجندات ملونين

قالوا أشى

أمريكانى وأسرائيلى وأيرانى

ونسيوا يقولوا

أن الأجندة

ورقها مصرى

ولونها زهرى

مصبوغة بدم سايل

فى الشوارع والحوارى

من رصاص

أبن الحرام

وياللى خايف

ع النظام

ع الأمان

ياللى خايف

تبقى فوضى

يوم رحيل

هو من أمتى

الكلام دة

هو من امتى

النظام كان حماية

وكان ملاذ

هو من أمتى

الحرامى كان

فى صفك أنحياز

هو جوعك

هو فقرك

لما ذلك

كان أمان

كان حماية

فى يوم لعرضك

كان حمى فى يوم كرامتك

ولا كان هو الهوان

يا أخويا

فى المواطنة

مصر حرة

مصر باقية

وأحنا فى عداد الزوال

عايز تأيد

روح وأيد

وأرفع شعار

مصر مبارك

مصر الاستقرار

معاة

وأنكر جميل شعب

كامل عوده ثابت

وحمله من حمل الجبال

لكن أحنا

فى الميدان

مصنع رجال

هم دول

بالنسبة لينا الأمان

فى الميدان

7 comments:

واحد من الناس said...

ربنا معانا

بس واضح إن الراجل ده ملزوق في الكرسي بغره

يبقى لازم نقطع اللحم اللي بين وراكه وبين الكرسي

ربنا يعينا عليه

shemo_ joker said...

السلام عليكم.......
ازيك يا شاعر

ال نفسى افهمه بجد هى الناس الى مأيده دى مايدة ع اى اساسا مش فاهمة
هما نسوا الى ماتوا فى العباراتت وفى القطارات ناسوا الى بيتهانوا كل يوم فى الاقسام ناسوا الجاعنيين والعريانيين والشحتيين ناسوا التعليم المتخلف الى احنا ضحيته ناسوا البطالة والعنوسة والخلف الى احنا فى بسبب نبى قادم واحد وكلاب مربيهم حوالية عشان يحموه

وبيقولولك رمز رمز ايه بس
لو حيبقى رمز يبقى رمز لحاجة واحدة الفساد والسرقة

مصر مش محتاجة رموز هى لوحدها رمز


ع الرغم انى كنت خايفة اوى فى الاول من الى الرعب الى كنا عايشيين فى بس هى مش فارقة ماحنا طول عمرنا خاييفين

خايفين نذاكر وجيب مجموع وندخل كليات نتخرج منها وناعد فىا لبيت خايفين يجى بكرة ونلقيش ناكل خايفين
نكبر ومنعرفش نتجوز وع طول خايفين

نخاف بأه مرة ع خوفنا ونحاول نعمل حاجة عشان منخافش بعد كد

ربنا معانا يارب ويرحم الشباب الى ضحوا بحيتهم عشان احنا من بعديهم نعرف نعيش وراسنا مرفوعة

ربنا يخلصنا منه......
تسلم دماغك ياشاعر
دومت بخير
فى رعاية الله
shemo

شمس النهار said...

فاااااااااااكر لما كنت بقولك عندي امل

الحمد لله

وبعد اذنك هنزل البوست عندي

ده مش شعر ده نور وناااار

تسلم ايدك

elsha3er said...

واحد من الناس

أولا أهلا وسهلا بيك ومبروك علينا ثورة مصر حكاية ملزوق بقى دى انا شايف انه كل يوم بيتنازل وأدينا بنقول يارب ولو حكاية نقطع لحم فخاده دى أسرع انا معنديش أى مانع هههههههههه

elsha3er said...

shemo_joker
أهلا بيكى
والله الناس دى غريبة انا كنت بضرب كف على كف من الناس دى طلعوا منين مش عارف بس أرجع وأقول ان كل دة من قلة الوعى والتعليم على مدار 30 سنة لكن من النهاردة خلاص ان شاء الله عهد جديد
ربنا معانا

elsha3er said...

شمس النهار
أهلا بيكى فاكر وصدقت وأمنت لانى كنت فاقد الامل الحمد لله الحمد لله
يا سلام المدونة والله كلها تحت أمر حضرتك ومن غير أستأذان طبعا

سمكه واحده said...

مبرررررررررررروك يا شاعر
الف مبروك علينا كلنا
مصر رجعت لينا تاني
صباح الجمال والحريه