Wednesday, February 11, 2009

فى المدونة الاخرى هتلر رجل ظلمه التاريخ
http://fagreltarekh2.blogspot.com/

هذة القصيدة لا تعبر الا عن رأى صاحبها




دة يبقى مين

مزفلط محفلط
كتير الكلام
مقفل عيونه
وعايز ينام
ومكلمنجى
وصايع حلنجى
وداير ولافف
وفارس همام
سياسته مكبر
وطاطى وأفور
وسيبلو افاك
وسيبك وحلك
هنا او هناك
ودقنه فى كرشه
وابنه فى حجره
ينطط فى ابنه
يبطط فى شعبه
يقصقص فى ريشك
يقفل فى شيشك
وسايب كلابه
فى كل مكان
وقافل فى بابك
وايه اللى نابك
غير خلا جنابك
خايف جبان
ونفسك تفلفص
وعلية تخلص
بقلب الحكومة
وزقة وأومة
وتخلص اوام
فتقدر تقولى
يا شاطر زمانك
يا قاعد مكانك
وسادد ودانك
دة يبقى مين
واللى يقولو
حيبقى افولو
وأوشك نزولو
على الابتداء

احمد الشاعر
www.elsha3er1.blogspot.com



83 comments:

EMMY BABY said...

ياعينى ياعينى على السيم

طبعا كلنا عارفينه

سلوى said...

إيه السؤال ده بقى

إنت عايز إحنا اللي نقول

ماشي
ده حبيب الملايين :))

حسبي الله ونعم الوكيل

الكلمات حلوة أوى

ندا منير said...

جميل جدا
بيعجبنى انك تقدر تكتب فى كذا مجال
وكله بيبقى جميل جدا


بس صحيح انت تقصد مين


هههههههههههههههه

خالد فوده said...

يا سلام عليك والله متألق بلا مبالغه
فينك من زماان طمني عليك
ربنا يوفقك

mahasen saber said...

يستحسن برضه انها تعبر

عن رأى صاحبها
ههههههههههههههه

أمل حمدي said...

بتعبر عن رأي الشعب المتبطط

المتقصقص ريشه

المقفول شبابيكه

واللي مش عارف يفلفص

سلام يا أحمد

princess said...

انت عارف واحنا عارفين
هو واحد من البندامين
ههههههههه
بس خلاص:))

Anonymous said...

بجد و الله كلامك عجبنى






بس بلاش تانى مرة تجيب سيرة اللى أكبر منك عشان عييييييييييب :)))

أكون أو لا أكون said...

ده ابو راسين هههههههههههههههههه
ابو رجل مسلوخه... ههههههههه

الكلمات جميله يا احمد...
تسلم...

mohamed ghalia said...

الله عليك يا شاعر
دايما رائع فى كتاباتك
دمت بكل الود

أميرة الجنة said...

السلام عليكم
بجد ايه الحلاوة دى بس انا مش هقولك ده يبقى ميييييييييييييييين
مدونتك رائعة وخلاص هاجى على طول لانى بحب عم نجم زيك وان شاء الله هتكون زيه
دمت مبدعا يا عم الشاعر

سارة نجاتى said...

ماركة الحلاوة اللى بتحبها ايه عشان ابقى أفتكرك بحاجة كده ساعة زنقة ؟؟هههههه
لا عجبتنى بجد قول اللى فى نفسك و لا يهمك كده على طول

Unknown said...

عوكل
(:

Anonymous said...

انااااااااااااااا
اجاوب اجاوب
ماشى يا احمد
ربنا يستر
بالنسبه للقصيده حلوة بجد
احترم يك انك بتعبر عن رايك بكل صراحة
بجد بحب الموضوع ده اوى

ربنا معاك
لا اله ا لاالله

جوجو said...

السلام عليكم

طبعا المروض اجاوب

بس انا عارفة الاجابة بس بلاااش بلااااش

كلماتك بسيطة اوى وجميلة

ربنا يوفقك

Anonymous said...

ههههههههههههه
جميله اوي يا احمد
وطبعا كلنا عارفين مين.. عشان كدا كويس انها بتعبر عن رأي صاحبها بس :))

حمد الله ع السلامه
:)

تحياتي

الازهرى said...

تصدقنى لو قلت لك انى احيانا احتار فى الحل
ناس كتيييييييييير ممكن تكون

تحياتى دوما

أية الشقية الشعنونة said...

اممممممممممممممم

العجل فى بطن أمه

بس انا معرفش امه

عيب بردو

هههههههههههههههه

ياترى مين يا ترى مين

لالالالا مش عارفة خالص انا
أنا غلبانة يا عم

ههههههههههههههههه

بوست جميل

ما شاء الله مفقدتش الحساس بالكتابة اهو الحمد لله

تسلم ايدك يا راجل

يلا ربنا يزيح

تحياتى
سلام عليكم

حسن حنفى said...

طب ما تقول اسمه انت


وانا هعمل كام اتصال كده

:d

هههههههههههههههه

ربنا يخليه لينا :p

Hanan Elshafey said...

كلماتك رائعه
وبحق اسلوبك هذه المره جميل جدا
تحياتي

عابرة said...

انت مش حتبطل تتكلم علي اكبر منك
انت عاوز تودي نفسك بداهيه لو مكنتش مهتم بنفسك في ناس بيفتقدوا غيايبك

*******
بالمناسبة انا مغبتش كتير بس للاسف غمامة السواد مزاحتش عني بعد بس عن قريب حتنشال نهائي وتشوف حاجه جديدة
زي ما انت حتحاول تعمل ابعد شوي عن الكبار وتكلم عن حاجه تاني

ولد مصري said...

يا راااااجل

بقى عايزنا أحنا اللي نقول ده يبقى مين؟

على العموم حاضر يا سيدي انا هقول عليه ورزقي على الله .. طبعا حضرتك بتكلم عن طبق الكشري ... يوووه أقصد بتتكلم على واحد لسه واكل طبق كشري وعمال توصف فيه ان بعد ما أكل فعايز ينام وكده يعني .. طب دي حتى كانت واضحة خالص


على فكرة بقالك فترة منورتنيش والمدونة بقت ضلمة إوعى تكون واخد على خاطرك مني وانا مش واخد بالي؟

تحياتي

elsha3er said...

EMMY BABY

اهلا بيكى

كويس انك عرفتية بس كنت عايزك تقولية


احمد الشاعر

elsha3er said...

سلوى

اهلا بيكى منورة

بالظبط هو دة حبيب الملايين


احمد الشاعر

elsha3er said...

ندا منير

اهلا بيكى

الحمد لله انها عجبتك ومافيش نقد المرة دى

قولى انتى انا معرفش هو مين

احمد الشاعر

elsha3er said...

خالد فوده - Khaled fouda

اهلا بيكى ياخالد

منورنى والله انا موجود الحمد لله وشكرا على الكلام الحلو دة


احمد الشاعر

elsha3er said...

mahasen saber

اهلا بيكى

عشان تعرفو بس انى بخاف عليكم اكتر من نفسى


احمد الشاعر

elsha3er said...

ماما أمولة

اهلا بيكى


ويارب اكون قدرت اوصل صورة الشعب وحالتنا صح


احمد الشاعر

elsha3er said...

princess

منورة والله

بس انا كنت عايزك تقولى اسمه عشان انا معرفوش

ههههههه

احمد الشاعر

elsha3er said...

انا ودماغي

منورة والله

خلاص انا مش حعمل كدة تانى

تحياتى

احمد الشاعر

elsha3er said...

أكون أو لا أكون

اهلا بيكى منورانى

لا هو الحقيقة ابو سبع رجلين
هههه



احمد الشاعر

elsha3er said...

mohamed ghalia

منور يا محمد

والله ربنا يخليك ليا يا محمد على الكلام الحلو دة


احمد الشاعر

elsha3er said...

أميرة الجنة

اهلا بيكى

لا لازم تقوليه

وان شاء الله حنكون على تواصل على طول

احمد الشاعر

elsha3er said...

سارة نجاتى

اهلا بيكى

رشيدى الميزان

وبعدين اية ياسارة انتى بتسخنينى اقول اللى فى نفسى على طول ولما اتمسك ولاحد حيعرفنى
ماشى


احمد الشاعر

elsha3er said...

esraa

منورة والله

فينك بقالك فترة كبيرة ولا تعرفينا

اما عن الاجابة

الله اعلم

ممكن يكون بوحة مثلا

احمد الشاعر

elsha3er said...

brave heart

نيرة

اهلا بيكى

الحمد لله انها عجبتك

بس انا مستنى الاجابة

احمد الشاعر

elsha3er said...

جوجو


اهلا بيكى


بلاش لية انتى خايفة ولا حاجة


احمد الشاعر

elsha3er said...

hager za3bal

اهلا بيكى

ربنا يخليكى

وربنا يستر


احمد الشاعر

elsha3er said...

الازهرى

اهلا بيك

انا عارف والله عندك حق بلدنا كلها من دول


احمد الشاعر

elsha3er said...

أية الشقية الشعنونة

اهلا بيكى منورة

الاجابة الله اعلم

بس الحمد لله انها عجبتك


احمد الشاعر

elsha3er said...

حسن حنفى

حسن ازيك والله واحشنى

لا انا معرفوش

من غير اتصالات انا ممكن اسلم نفسى


احمد الشاعر

elsha3er said...

حنان الشافعي

اهلا بيكى

وربنا يخليكى يارب

حقول اية

خلى الناس يتعلمو من كلامك زوق الاسكندرانية مع بعض

تحياتى لكل اهلى اهل الاسكندرية

احمد الشاعر

elsha3er said...

عابرة

اهلا بيكى

لا ما بطلتش

ومش حبطل

لان اللى فى داء ما بيغيروش
غصب عنى

ربنا يفك كربك وترجعيلنا بسرعة

تحياتى


احمد الشاعر

elsha3er said...

ولد مصري

اهلا بيك يا باشا

لا انا بكلم على محل الكشرى نفسه

هههههه

وبعدين انا ازعل منك لية دة انت حبيبى والله

لا هى بس كانت مشغوليات وخلصت

دة احنا ولود عم ياراجل

ان شاء الله لن ولم يمر هذا اليوم الا وسوف اكون عامل فرح عندك

دقوا الطبول وعلقو الانوار

احمد الشاعر

دينا حامد said...

اكيد كل الشعب يعرفه

هو مين هو مين
هو اللي ناهبنا سنين
D:

عرفته؟


تحياتي

سمكه واحده said...

عروستي

طبعا عارفينوا بس خليها في سرك
كل مره كلامك بيبقي اجمل من اللي قبله
شكلي كده قريب هزوك بالعيش والحلاوه
تحياتي

بالنسبه للحزن والفرح لازم منفرحش اوي وبردو منزعلش اوي عشان دي الدنيا بتعتنا وملهاش امان

القلم السكندري said...

تقريبا كدة "عجل أبيس"..

عاشقه الرومانسيه said...

ده يبقى العجل فى بطن امه


هههههههههه
ما احنا كلنا عارفينه طبعا
لا مش العجل
انت كده ظلمت العجل ياراجل

marmar said...

اجاااااااااااااااااااوب انا
بس ايه الجايزه ؟؟
لو هتديني رحله لشرم الشيخ مع اقامه تلات ليالي في شيرتون وتذكره رايح جاي هجااااااااوب
اه كل ده سامعاك بوداني
مش فلوسنا ؟؟
بندفعها وناخدها تاني
فيها حاجة دي؟؟؟
يلا مبااااااارك عليك البوست الجميل

blue-wave said...

على فكرة
معلش
احنا لا ولود عم ولا اعرفك اصلا:))
انا عايز اعيش يا عم
دانت بتخبط فى الحلل :))
ربنا معاك
بس بينى وبينك
تحفه يابوحميد

ساره said...

مشاء الله عليك يا احمد

بس انا ماراح اقول مين
عشان انا ماليش دعوه :)

بس بجد خطير
الله يوفقك

Anonymous said...

كلام جميل
سلمت يداك والله يا احمد
عبرت بجمال عن واقع مرير

هى فوضى said...

تناول جميل جدا
وبلغة بسيطة لما يحدث

ساره النومس said...

جبتني الخاطرة :p

اخي العزيز .. تصدق جملة وحدة بكل صورة من صور الزعماء رسمت علامات استفهام كثيرة في مخي ونفسي اعرف رايك فيهم كلهم بصراحة .. شكرا لك وسأكون على اتصال مع مدونتك دائما :)

gogo!sf said...

لا بجد شاعر

ربنا ينتقم من المفترى

معلش بقى اول زيارة لية بدعى فيها
على المفترى

حقبقى كلام جميل

gogo!sf said...
This comment has been removed by the author.
أختكم فى الله said...

السلام عليكم


أخى الكريم بعتذر عن الغياب الطويل ده وعدم قدرتى على متابعة مدونة حضرتك

شعر جميل كعادتك

جزاك الله خيرا

مهرة سالم said...

السلام عليكم ..
بس حبيت أسلم ..
...
دمت بخير

تسنيم محمود حسين said...

السلام عليكم ورحمة الله وبركاته

ماشاء الله اسلوبك راااائع جدااا....
حكاية هو مين دى.اقول ولا مقولش....
طبعاهو.......(الجبن سيد الأخلاق)بس هو....حبيب الملايين

والسلام عليكم ورحمة الله وبركاته

elsha3er said...

دينا حامد


اهلا بيكى

والله انا برده معرفتوش

ياريت لو تقوليلى اسمه

ههههههههههههه

احمد الشاعر

elsha3er said...

سمكه واحده

اهلا بيكى

ربنا يخليكى على الكلام الحلو
دة وانا على فكرة بحب حلاوة البوادى


عندك حق الدنيا بتعتنا لاينفع فيها نفرح اوى ولا نزعل اوى


احمد الشاعر

elsha3er said...

القلم السكندري


اهلا بيك

اسعدنى زيارتك

لا مش عجل ابيس

لو عرفته قول اسمه


احمد الشاعر

elsha3er said...

عاشقه الرومانسيه


اهلا بيكى منورة


لا احنا كدة فعلا ظلمنا العجل


تحياتى احمد الشاعر

elsha3er said...

marmar


يا جماااااااااااااااال
تعليقك

اة انتى لو قلتيه مباشرة حتخدى رحلة ابدية وحتقيمى فى الشيراتون برده

مباااااااااااارك علينا كلنا البوست

تحياتى


احمد الشاعر

elsha3er said...

blue-wave

دكتور

والله منورنى


ربنا يعلم والله انا بحبك اداية

ماشى يعم مش ولود عم


وربنا يخليك


تحياتى


احمد الشاعر

elsha3er said...

ساره


اهلا بأهل السعودية

بجد انا فرحان جدا من زيارتك

والحمد لله ان الكلام عجبك بس انتى الوحيدة تقدرى تقولى مين من غير ما حد يجي جنبك


احمد الشاعر

elsha3er said...

ساره


اهلا بأهل السعودية

بجد انا فرحان جدا من زيارتك

والحمد لله ان الكلام عجبك بس انتى الوحيدة تقدرى تقولى مين من غير ما حد يجي جنبك


احمد الشاعر

elsha3er said...

نهر الحب


اهلا بيكى


بس يارب اكون عبرت عنه صح

تحياتى


احمد الشاعر

elsha3er said...

هى فوضى

اهلا بيكى

وربنا يخليكى على المجاملة اللطيفة دى


تحياتى


احمد الشاعر

elsha3er said...

طموحة مملوحة


اهلا بيكى اهل العلم وكلية العلوم

والله انا مبسوط جدا من الزيارة

وحقولك تفسير التعليقات اللى على الصور

لان انا ما يرضنيش ان يبقى فى علامات استفهام

بس دة لا يعبر الا عن رأيي

نجم انا بحبه جدا وشايف ان هو شاعر بجد شاعر للناس شايل همومهم

هتلر الكل افترا عليه لانه حرق اليهود واتهم بالخيانه فى المانيا مع انه كان بيحاول يصلحها بعد الازمة العالمية عام 1929
اما عن حرق اليهود فقال هتلر فى كتابه كفاحى
كان بأمكانى احراق كل اليهود ولمنى تركت حفنة منهم لتعلموا لماذا احرقتهم

موشى ديان انا بكرهه كرجل مسلم وعربى لكن ايه المانع انى اعجب بشخصيته واحاول اقلدها واستخدمها فى الخير مع تطبيق الاسلام ودة اقتباص من الغرب لكن فى الخير

محمد على باشا
بجد مثال يحتذى به كملك او رئيس انا عن نفسى بحب سياسته جدا هو صحيح وصولى وقتل اللى وصلوه فى الحكم لكنها السياسة
وعجبنى اكتر سياسة توحيد البلاد مصر والسودان والشام وهكذا متحديا الضغوط الدولية الى ان رضخ لها ودة العيب الوحيد الراجل دة كان ممكن يغير خريطة العالم

جمال عبد الناصر
رئيس من زاوية واحدة كان نصره فى المعارك نصر سياسى وخسارة عسكرية ودة مش مطلوب وجميل انه امم القناة ولكن سلبياته كتيرة يكفى محاولة قضائه على الاخوان وتقيد حريتهم ظهور بعض الفساد السياسى داخل مصر فى عهد عبد الناصر دة غير الهزايم العسكرية
بسبب الثقة الزايدة فى قواده زى عامر

مصطفى كامل
اعتقد واضح دور هذا الرجل فى مصر الا ما كنوش قتلوه

موسلينى

طاغية ايطاليا يكفى الحكم الديكتاتورى وما فعله بمعارضيه فى ايطاليا الى جانب مذابح الحبشة فى عهده
وتحياته لعصبة الامم

نجيب

الرئيس المختفى من التاريخ اللى حاول الكل محو زكراة وقليل لما حد يتكلم عنه مع ان الراجل دة هو الثورة اساسا
فأن نسوه انا اتذكره

غاندى

رجل يقول ان الخطر الحقيقى على الهندوس هو المسلمين
ويكفى قتل قرى بأكملها للمسلمين على يد سفاركار
يبقى ليه احبه

فاروق الاول
احنا كتب التاريخ مصوراة الرجل الفاسد اللى مش خايف على مصالح بلده مع ان فاروق كان بيحب مصر جدا هو بس كان صغير فكان ناس تانية بتتحكم فيه وفى فكره
ويكفى عندما قامت الثورة وحوصر قصره وبدأ الجيش وحرسه يطلقو النار طلب من الحرس انهم يوقفو الضرب وقال احنا كلنا مصرين وخاف لحد من هنا او من هنا يموت

الاخوان

لا تعليق انا بس مش بحب فكرهم ليس اكتر

السادات

بحبه اوى اة ليه سلبيات وليه اجابيات بس بحبه ومش عشان 73 بس لا والله دة له حاجات تتقال فى ميت كتاب

سعد زغلول

رجل سياسى فاشل لم يستطع فى اى مؤتمر ان يحصل لمصر شىء واحد عكس مصطفى كامل
بالاضافه لحياته الشخصية اللى بجد فيها حاجات ما تتقلش

عائلة الرئيس

مش محتاجة اوضح

السلطان عبد الحميد2

اخر الخلفاء الاتراك
ويكفى محاولة اصلاحه للجيوش وتطويرها
ومقاومته للأنكشارية الطاغية
ومن بعده من السلاطين قد تفشى فى عهدهم الفساد والرشوة وضعف الجيش

تحياتى


احمد الشاعر

elsha3er said...

gogo!sf

اهلا بيكى


انتى اول زيارة مسموح ليمى تعملى اللى انتى عايزاة تانى زيارة ممكن نتحاسب بقى

ان شاء الله نكون على تواصل

تحياتى

احمد الشاعر

elsha3er said...

أختكم فى الله

اهلا بيكى

كل ما يسرنى الان هو عودتك وزيارتك

تحياتى


احمد الشاعر

elsha3er said...

نهــــــــــار

اهلا بيكى انتى تيجى اى وقت

تسلمى تاخدى قهوة شاى براحتك

مشكورة اختى

احمد الشاعر

elsha3er said...

تسنيم حسين


اهلا بيكى

وشكرا للمجاملة اللطيفة دى

هو الجبن هنا كل الاخلاق

تحياتى


احمد الشاعر

فتــافيت (رحاب الخضري) said...

شكلك متأثر أوي بنجم.. اسلوبك قريب منه اوي
بس رااااااااااااائع بجد
والاحلى بقى الصور اللي حاطتها وكلامك عليها.. انت ياابني انسان بتفهم بجد
احييييييييييييييك
وبذات جمال اللي التاريخ نفخه وخلافة فقاعة العرب .. هتلر الاسطورة
والسادات الرئيس المؤمن الله يرحمه
ولا العائلة.. نو كومنت

انت فظيييييييييييع
ربنا يحميك

Unknown said...

جميل

بس انا حاسس انى قريتها للنجم احمد فؤاد نجم

ولا فى تاثير بس


عموما جميل

اقصوصه said...

حلوه الكلمات

متنساقه وبسيطه

تقبل مروري :)

واحد من الناس said...

رااااااااااااااااااائعه يا عمنا

طبعا أنا مش عارفه خالص

أنا طول عمري خايب في الألغاز

واخترناه..اخترناه..وعشان كده إحنا اخترناه...ترباتتي ترباتتو..

elsha3er said...

فتافيت

اهلا بيكى بجد انتى احرجتينى مش عارف ارد بكلمة شكر واحدة

ربنا يخليكى


ان شاء الله نكون على تواصل


احمد الشاعر

elsha3er said...

محدش بيموت ناقص حلم

اهلا بيك

ممكن تلاقى تأثر كبير

ممكن فى كلمة حلانجى

ومكلمنجى


زى نجم فى البيت دة

الثوري النوري الكلمنجي
هلاب الديـن الشفطنجـي


كدة يعنى

اسعدنى مرورك

تحياتى

احمد الشاعر

elsha3er said...

اقصوصه

اهلا بيكى

وربنا يكرمك على المجاملة اللطيفة دى

ان شاء الله نكون على تواصل

تحياتى


احمد الشاعر

elsha3er said...

واحد من الناس

اهلا بيك

اسعدنى مرورك

والله دة انتم اللى عمامى


ان شاء الله نكون فى تواصل

احمد الشاعر

مجلة الأم الصغيرة said...

كما عهدناك دوما
إبدااااع بكل المقاييس
عجبني انتقائك للكلمات
و براءة السؤال : ده يبقى مين؟