Tuesday, January 27, 2009

اتمنى بعد الغياب ما كنش فقدت الاحساس بالكتابة على الرغم انى اكيد اتأثرت ودة اللى حعرفوا منكم

احمد الشاعر


حوار على قهوة
بلدى

الريس مات الريس مات........صحيح يا صاحبى الحمار مات.......ولا الشعب بيقول اشاعات.......ويبقى كل دى تفاهات.......ونرجع نلبس اسود كروهات........سدأنى مات سدأنى مات.......يا سلام لو كلامك جد ومات........واشوف اسمه فى صفحة الوفيات........والله افتح اربع دست شربات........بس متأكد ولا دى حركات.......اصل انا عارفه دة بتاع حوارات........عامل زى الكيت كات........اقرع ونزهى وبتاع كلمات.......واخد انت بالك ياد ياعماد.......فاكر خطبة التعلب فات........وفى ديله سبع لفات.......طب فاكر خطبة الرفق بالحيوانات.......دى فى مادة انسانيات.......طب فاكر خطبة انسى اللى فات.......اة مش دى بتاعت جنات......لا دى بتاعت العادلى ابو كماشات....دة الريس مألفها على موسيقى الكلبشات......وأول مطلع منها اهلا يا بهوات........ادينى افاك وانسى اللى فات.......اتغنت دى ايام الانتخابات........ايام ماضربو الشباب فى كل المحطات.......دة كان يوم مهلبية بالمكسرات..........ولا الغلو دة ياعماد.......مين يصدق ان البطيخة ب10جنيهات........ولا العيش ابو سراطانات......اة لو اعرف مين السبب .........بس الحمد لله اهو مات.........اسكت شوية سامع صوت بوليس وعربيات.......يارب يكون عدا وفات............لا دول جاين علينا وبيضربو كلكسات........وبيسئلو مين اللى قال الريس مات.......حرد انا........والله يا باشا الواد عماد........البقاء لله ياعماد........دة انت حتاكل حاجات..


احمد الشاعر
www.elsha3er1.blogspot.com

88 comments:

ماما أمولة said...

ههههههههههههههه

الله يرحمك يا عماد

لم يفقد قلمك بريقه رغم البعاد

دمت بكل للخير

سلام

marmar said...

انا عندي تعليق صغير بس مش عل بوست
لا على صورة جمال عبد الناصر الرجل الشجاع اللي ملايين الملايين بيعشقوه مينفعش وميصحش وميجوزش تكتب كده عليه في الصورة الي حطتها
ما اظنش ان ده هيكون في صالحك ابدا
لانك حتى لو شايف ان كلامك صح فالملايين بيحبوه وكفايه انجازاته في مصر سلام

Brave Heart said...

ههههههههههههههههههههههههههههه
ربنا معاك يا عماد
لالالا حلوة
بس بصراحة مش زى الاول
بس كويس انك جيت
ايه يا ابنى
عملت ايه فى الامتحانات
هه
طمنا ياله بأه

دمت مبدع يا شاعر
لا ال الا الله

عاشقه الرومانسيه said...

ايه اللى عملته فى عماد ده؟
ههههههههه
يلا بالشفا ربنا يسمع منك

اوعى تكون المدونه دى متراقبه ولا انت حاطط على بابها اتنين يراقبوا الجو؟

اه اصل العمر مش بعزقه وحبايبنا الحلوين مش محتاجين وصايه

عجبتنى كلاماتك جدااااااا

تحيـــــاتـى

mohamed ghalia said...

دى مجرد إشاعات
هههههههههههههههههه
حمدا لله على السلامة

maryooom said...

ههههههههههههههههههههههههههههههههههههههههههههههههههه
اسكت شوية سامع صوت بوليس وعربيات.......يارب يكون عدا وفات............لا دول جاين علينا وبيضربو كلكسات........وبيسئلو مين اللى قال الريس مات.......حرد انا........والله يا باشا الواد عماد........البقاء لله ياعماد........دة انت حتاكل حاجات
تحياتي

أكون أو لا أكون said...

هههههههههههههههه عجيبه الكلمات...
الله يرحم عماد... خطيته في رقبة اللي دبسه...
; )

حسن حنفى said...

هههههههههههههه

ربنا يكون في عونه

ابقي طمنا عليه بقي

gana magde said...

ههههههههههههه

دا انت هتاكل حجات

حلوه بجد

تحياتى

جوجو said...

السلام عليكم

ازيك يااحمد اخبارك ايه واخبار الامتحانات

جميل البوست

بس هو مات ولا

تحياتى

عابرة said...

بتغيب وبتجيب بحقيبتك اروع الكتابات ولساتك متل ما انت الظاهر انك من النوع الي بيغيب وما بينسى ابدا شو يعني الكتابه
والله يرحمه لعماد وربنا يعين كل ال بقول الريس مات

smilyrose said...

الف حمدلله على سلامتك

وحشتنا جدا ووحشنا قلمك

يارب دايما معانا

ومنور كدا مدونتك

وزى عدتك كلمات جامدة قوى

وخارجة من جوة قوى

وربنا يستر ومنرحش كلنا بعيد قوى

ههههههههههههههه

حمدلله على سلامتك

اختك

smilyrose

روح الحب الصادق

سمكه واحده said...

تحففففففففففففففففففففففففه
شاعر مين ياعم ده هو اللي يتعلم منك سيبك انت
بجد والله جميله جدا بس انا مالي ياخويا انا مش هعلق لحسن احصل الوادعماد
تحياتي
وبجد دمت مبدع ولم يفقد قلمك ابداعه
تحياتي

عبدالهادى_سارة said...

d:
دمت

قطرات من شواطئ الحياة said...

شكلك حتحصل عماد قريب

أهلا بعودة قلمك لإبداعه

بس إيه حكاية الكيت كات دي؟؟

elsha3er said...

ماما امولة

البقاء لله دى اخرة اللى يكلم على الريس

وربنا يخليكى يا امى

اسمحيلى انى اقلك يا امى

احمد الشاعر

elsha3er said...

marmar

اهلا بيكى جميل ان عبد ناصر بطل شعبى ولكن لايذكر التاريخ الا انجازاته عشان كدة احنا مش عارفينه على حقيقته

وانا ما خافش ان حبى يتأثر عند حد طالما انا بقول الحق

وان تطع اغلب من فى الارض يضلوك عن سبيل الله

احمد الشاعر

elsha3er said...

Brave Heart

اهلا بيكى مش عارف لية حاسس انك علقتى هنا قبل كدة حاسس انى اعرفك من اسلوبك

الحمد لله واكيد يعنى فترة غياب لازم اتأثر شىء طبيعى

والامتحانات الحمد لله خلصت ومش لازم افتكر عملت اية


احمد الشاعر

elsha3er said...

عاشقة الرومانسية

اهلا بيكى منورة اكيد فى تابعين ليا بيراقبو الجو

وان شاء الله نكون على تواصل

احمد الشاعر

elsha3er said...

mohamed ghalia

محمد حبيبى واخويا اهلا بيك

اكيد اشاعات هو فى ريس بيموت

احمد الشاعر

elsha3er said...

maryooom

منورانى الزيارة الاولى ومش الاخيرة لان ان شاء الله حنكون على تواصل

ويارب تكون عجبتك


احمد الشاعر

elsha3er said...

اكون او لا اكون


الاخت الكبيرة الغالية طبعا دى مدونتك مش محتاجة ترحيب

انا ما كنش قصدى ادبسه

احمد الشاعر

الازهرى said...

طبعا ممنوع التعليق
والا واضح جدا انك بتبيع وعلى اول محطة

بجد كانت الكلمات جميلة
والفكرة ايضا

وهناك ملاحظة واحدة اسمح لى ان ارجئها حتى اكتب موضوعى الجديد بالفارس الاخير


تحياتى دوما

elsha3er said...

حسن حنفى

حسن اخويا الصغير يارب تكون موفق فى المذاكرة ونشوف المجمع بتاع الطب

اطمنك ايه هو اللى عند الحكومة بيرجع

احمد الشاعر

محمد عبد الباسط said...

ههههههههههههههههههههههههه
ما عهدته منك دائما قيمة ادبية وخفة دم غير مسبوقة
بورك بك اخى الشاعر
والله يكون فى عونك يا عماد

تقبل تحياتى

حلم كبير

elsha3er said...

gana magde

منورة وان شاء الله نكون على تواصل

والحمد لله انها عجبتك


احمد الشاعر

elsha3er said...

جوجو

اهلا بيكى الامتحانات الحمد لله

اما مات ولا دة سرى للغاية

احمد الشاعر

elsha3er said...

عابرة

اهلا بيكى وربنا يخليكى ليا يا رافعة معنوياتى



احمد الشاعر

elsha3er said...

smilyrose

الحمد لله انها عجبتك وشكرا ليكى

وربنا يستر وما نرحش بعيد قوى زى ما قلتى

احمد الشاعر

elsha3er said...

سمكة واحدة

ربنا يخليكى ان معنوياتى كدة عملت زى الاستيم حتضرب

انتى اللى علقتى وعلى فكرة انا ماعنديش غالى من اول قلم حبيعك زى عماد

احمد الشاعر

elsha3er said...

عبد الهادى سارة

ان شاء الله نكون على تواصل

شكرا لتعليقك

احمد الشاعر

elsha3er said...

قطرات من شواطئ الحياة

اهلا بيكى

ربنا يستر والله

اما الكيت كات دى بتطلق على كثير الكذب او بالبلدى المحوراتى

احمد الشاعر

elsha3er said...

الازهرى

اهلا بيك

اكيد يا معلم دة كله الا الحكومة دة انا ابيع ابويا قدام الحكومة مش عماد بس


احمد الشاعر

elsha3er said...

محمد عبد الباسط

ربنا يخليك ليا

وان شاء الله انا فضتلك وحنكون على تواصل

احمد الشاعر

☼♫♪ عمــاد الدين يــوسف ☼♫♪ said...

ههههههههههههههههههههه


ماشي يبو حميد كده تبلغ عني
هههههههههههههههههههه
زي منتا عشره على عشره

ربنا يتولاني بأه
ههههههههههه

تحياتي

dr_samarmar said...

ههههههههههههههه

يا عينى يا عماد


لا حلوة أوى ماشاء الله

و عايزة أشكرك على زيارتك للبلوج و ياريت ماتكنش الأخيرة :)

تحياتى

princess said...

امال لو معاك حساسية الكتابة كنت عملت ايه هههههه
لا بجد حلوة اوى:)

سارة نجاتى said...

شكلك انت اللى ح تلبس الأسود ههههههه

بعد شر عليك يا باشا , عجبتنى و حسيتها صادقة , دى مشاعر البنى أدم لما الريس مات

تحياتى

مـجـنـووون said...

حمدالله علي السلامه

وتسلم ايدك وقلمك المميز أخي الكريم


هو صحيح بجد الريس مات ؟؟

بعتقد انك بتحلم مفيش رائيس عربي بيموت

تقبل مروري
مجنووون

Brave Heart said...

طب هسالك سؤال وبعدين نتفاهم
انت تعتقد انا مين يعنى
ومن اسلوبى كمان
لا ما شاء الله عليك
بتاخد بالك من اسلوب كل واحد بيكلمك كويس


مودتى

لا اله الا الله

حنان الشافعي said...

جميله اوي يا أحمد
بالطبع قلمك لم يفقد تأثيره
دمت بروح الشعب

ريمان said...

ههههههههههههههه


ههههههههههههههههه


هههههههههههههههههههههههههه


لا لا

ده مش مات

دى مجرج اشعات

هههههههههه

اسلوبك بجد جميل اوى

وظريف جدا

احييك فعلا

مع تحياتى ليك

نهــــــــــار said...

السلام عليكم ...
لازلت شاعرنا
وأطمإنك أنك لم تفقد إحساس الكتابه..
بل نحن من إفتقد كتاباتك..
.....
دمت بخير..

elsha3er said...

☼♫♪ عمــاد الدين يــوسف ☼♫♪

وانا استجرى يا عمدة ابلغ عنك

دة انت اخويا والله

نورتنى


احمد الشاعر

elsha3er said...

dr_samarmar

منورانى وربنا يخليكى

وان شاء الله حنكون على تواصل

على طووووووووووووووووووووول

احمد الشاعر

elsha3er said...

princess

منورة ووالله وحشانى جدا

والله انا غلبان وعلى قدى

وربنا يخليكى ليا يا رفعة معنوياتى دايما


سلام يا ميس

الطالب
احمد الشاعر

elsha3er said...

سارة نجاتى

ربنا يستر بس انتى ادعيلى

تحياتى

احمد الشاعر

elsha3er said...

مـجـنـووون

اهلا بيك
ربنا يخليك ليا

لا زى ما انت قلت ما فيش رئيس عربى بيموت


احمد الشاعر

elsha3er said...

Brave Heart

انتى مين دى انا يعنى محددها بس حاسس انها غلط

مش مهم انتى مين انا اول ماشفت تعليقك حسيت انى اعرفك حد اعرفه اوى اوى والاسلوب قريب منى

ممكن اكون غلطان بس دة مجرد احساسى

والله اعلم

محمد رسول الله

احمد الشاعر

elsha3er said...

حنان الشافعي

اهلا بيكى منورة

والحمد لله انها عجبتك

تحياتى

احمد الشاعر

elsha3er said...

ريمان


اهلا بيكى

اول زيارة ومش الاخيرة ان شاء الله نكون على تواصل

وربنا يخليكى على المجاملة الحلوة دى


احمد الشاعر

elsha3er said...

نهــــــــــار

اهلا بيكى منورة
والحمد لله انى لسة بعرف اكتب اصل انا كنت حاسس انى مش عارف حتى اكتب كلمة معبرة

وان شاء الله حكون معاكم على طول

تحياتى

احمد الشاعر

سلوى said...

جميله أوى
بس دي إشاعات
مفيش ريس اسمه مات
الريس مش زي البشر
يموت من سكات
لأ ده لازمه إغتيالات
بس خساره عماد :)

عجبني عرض صور الزعماء ومشاهير السياسه
وتعليقك عليهم

ربنا يوفقك
ودمت بكل خير

blue-wave said...

هههههههههههههههههههه
الله يخرب بيت فقرك
راجع بدماغك الرهيبه دى تانى

دينا حامد said...

كتاباتك اللي قبل دي بتعجبني اكتر
ده رايي واتمنى ماتضايقيش

اهلا بعودتك مرة تانيه

تحياتي

ولد مصري said...

اولا حمدا لله على السلامة يا ابو حميد

ان شاء الله تكون الدراسة والامتحانات تمام

وحشتنا ووحشنا كلامك الجميل

هستناك على القهوة اوعى تتأخر

تحياتي

mahasen saber said...

الله يرحم سى عماد

حمدالله على السلامه يا شاعر

بس ليه الشتيمه وحمار مش عجبانى الشتيمه بتاتا خلى نقدك فى القصيده بحياديه وبناء وخالى من الشتائم عشان يكون بناء

DoNyA said...

هههههههههههههههههه

والله ياعماد شكلك مش فاهم حاجات
اصلها كلها اشاعات
بينشروها البهوات
علشان يقع فيها بدليتنا البهوات
اللي جايين يرددوا اشاعات
هتروح فيها رقاب
والله يرحمك ياعماد

elsha3er said...

سلوى

اهلا بيكى منورة

اتمنى ان نكون على تواصل

اكيد ما فيش رئيس عربى بيموت بالساهل

دة مش اكتر من رأيي فيهم


احمد الشاعر

elsha3er said...

blue-wave

والله واحشنى يا دكتور والف الف مبروك على الخطوبة

كل شيخ وله طريقة انت شاعر رومانسى وحبيب

لكن انا غلبان بحب السياسة

تحياتى

احمد الشاعر

elsha3er said...

دينا حامد

لا طبعا لايمكن ازعل لان مش لازم حتى بعد كدة كل كتاباتى تعجبك

عشان انا لو عارف ان انتم على كل حاجة تقولو الله

يبقى ليه انزل القصيدة اصلا

بالعكس انا فرحان جدا انك قلتى رأيك بصراحة

وان شاء الله القصيدة الجاية نوع جديد ما كتبتهوش قبل كدة ويارب يعجبك

تحياتى يا اختى الغالية



احمد الشاعر

elsha3er said...

ولد مصري

الحمد لله الامتحانات تمام

وعلى فكرة انا بحب اوى قعدة القهوة

تحياتى


احمد الشاعر

elsha3er said...

mahasen saber

منورة والله

والله يسلمك

على فكرة والله من غير ما تقولى انا كنت بفكر لها على بديل بدل الحمار

يعنى انا لم اقصد والله


احمد الشاعر

elsha3er said...

DoNyA

منورة

اتمنى ان نكون على تواصل وما تبقاش الزيارة الاخيرة

وان مبسوط جدا من المشاركة الجميلة دى اللى زودتيلى فيها ابيات

تحياتى لقلمك


احمد الشاعر

انا ودماغي said...

هههههههههههههههههههه

ماشى ماشى

الله يرحم عماد و ربنا يستر

ندا منير said...

اولا احب اقولك ان اللى فيه موهبة مبيتاثرش فى ممارستها لو بعد عنها فترة
واحيانا بيرجع احسن من الاول

وانت برده كنت كاتب موضوع عن الريس
برده ذاكر فيه كلمة حمار
فاعذرنى
هقولك تانى انى مش معاك فى كدة
النقد من وجهة نظرى عشان يبقى نقد كويس ميبقاش فيه غلط او شتايم

ومع ذلك فهقولك اسلوبك حلو فى الكتابة

هى فوضى said...

جميل جد الشعر دا
والاجمل احساسك
بس لى اسئلة لو سمحت
معنى التعليقات على صورك لو ممكن ؟

EMMY BABY said...

هههههههههههههههههههه حلو اوى الاسلوب ده

بس ليه مكتبتش كلمة صدقنى عادية وكتبتها كدة معتقدش انها لو اكتبت عادية هتأثر على الوزن لاننا كدة بنقراها عامى

حاسب تتمسك بقى او مبدهاش انا هروح ابلغ عنك وخلاص

تحياتى

ايمى

brave heart said...

hahahahahahhahaha
واللهى لأنت قايل
بجد لازم اعرف
مش عارفه
انا فاهماك والا لأه
بس عايزة اتأكده الأول
هاااااه
قول ياله
بجد
مستنيه
كلمه واحده
يله بجد
قول
ونشوف مين فينا


مودتى يا شاعر


لا اله الا الله






اه كنت هنسا


لو قلت صح
ليك مكافئه
ههههههههه
سلام

نهر الحب said...

السلام عليكم
ازيك يا عماد عامل اية
عودا حميدا
وشعر جميل جدا
الحمد لله مازال قلمك ينبض بالحياة
والاحساس بما يدور حوله من احداث

لى سؤال لو سمحت
كتبت على الصور مجموعه من التعليقات اكن لها كل الاحترام ولرأيك لكنى اود ان اعرف اسبابها
لو سمحت يعنى ؟؟
فهل من الممكن ام انه تطفل منى


تحياتى واحترامى

elsha3er said...

انا ودماغي

اهلا بيكى منورة مدونتك

ان شاء الله حيستر

احمد الشاعر

elsha3er said...

ندا منير


منورة والله انا جت معايا كدة غير مقصودة والله


احمد الشاعر

elsha3er said...

هى فوضى


منورة المدونة
وشكرا لمجاملتك اللطيفة

وحقول معنى التعليقات على الصور

نجم انا بحبه جدا وشايف ان هو شاعر بجد

هتلر الكل افترا عليه لانه حرق اليهود واتهم بالخيانه فى المانيا مع انه كان بيحاول يصلحها بعد الازمة العالمية عام 1929
اما عن حرق اليهود فقال هتلر فى كتابه كفاحى
كان بأمكانى احراق كل اليهود ولمنى تركت حفنة منهم لتعلموا لماذا احرقتهم

موشى ديان انا بكرهه كرجل مسلم وعربى لكن ايه المانع انى اعجب بشخصيته واحاول اقلدها واستخدمها فى الخير مع تطبيق الاسلام ودة اقتباص من الغرب لكن فى الخير

محمد على باشا
بجد مثال يحتذى به كملك او رئيس انا عن نفسى بحب سياسته جدا هو صحيح وصولى وقتل اللى وصلوه فى الحكم لكنها السياسة
وعجبنى اكتر سياسة توحيد البلاد مصر والسودان والشام وهكذا متحديا الضغوط الدولية الى ان رضخ لها ودة العيب الوحيد الراجل دة كان ممكن يغير خريطة العالم

جمال عبد الناصر
رئيس من زاوية واحدة كان نصره فى المعارك نصر سياسى وخسارة عسكرية ودة مش مطلوب وجميل انه امم القناة ولكن سلبياته كتيرة يكفى محاولة قضائه على الاخوان وتقيد حريتهم ظهور بعض الفساد السياسى داخل مصر فى عهد عبد الناصر دة غير الهزايم العسكرية
بسبب الثقة الزايدة فى قواده زى عامر

مصطفى كامل
اعتقد واضح دور هذا الرجل فى مصر الا ما كنوش قتلوه

موسلينى

طاغية ايطاليا يكفى الحكم الديكتاتورى وما فعله بمعارضيه فى ايطاليا الى جانب مذابح الحبشة فى عهده
وتحياته لعصبة الامم

نجيب

الرئيس المختفى من التاريخ اللى حاول الكل محو زكراة وقليل لما حد يتكلم عنه مع ان الراجل دة هو الثورة اساسا
فأن نسوه انا اتذكره

غاندى

رجل يقول ان الخطر الحقيقى على الهندوس هو المسلمين
ويكفى قتل قرى بأكملها للمسلمين على يد سفاركار
يبقى ليه احبه

فاروق الاول
احنا كتب التاريخ مصوراة الرجل الفاسد اللى مش خايف على مصالح بلده مع ان فاروق كان بيحب مصر جدا هو بس كان صغير فكان ناس تانية بتتحكم فيه وفى فكره
ويكفى عندما قامت الثورة وحوصر قصره وبدأ الجيش وحرسه يطلقو النار طلب من الحرس انهم يوقفو الضرب وقال احنا كلنا مصرين وخاف لحد من هنا او من هنا يموت

الاخوان

لا تعليق انا بس مش بحب فكرهم ليس اكتر

السادات

بحبه اوى اة ليه سلبيات وليه اجابيات بس بحبه ومش عشان 73 بس لا والله دة له حاجات تتقال فى ميت كتاب

سعد زغلول

رجل سياسى فاشل لم يستطع فى اى مؤتمر ان يحصل لمصر شىء واحد عكس مصطفى كامل
بالاضافه لحياته الشخصية اللى بجد فيها حاجات ما تتقلش

عائلة الرئيس

مش محتاجة اوضح

السلطان عبد الحميد2

اخر الخلفاء الاتراك
ويكفى محاولة اصلاحه للجيوش وتطويرها
ومقاومته للأنكشارية الطاغية
ومن بعده من السلاطين قد تفشى فى عهدهم الفساد والرشوة وضعف الجيش

تحياتى


احمد الشاعر

elsha3er said...

EMMY BABY

اهلا بيكى منورة

ربنا يخليكى

هى الكلمة جت كدة مش اكتر

خلاص بعتينى فى اول لحظة

دى برده اخلاق ولاد البلد

تحياتى


احمد الشاعر

elsha3er said...

brave heart

بصى ياستى انا احساسى بيقول

انك اختى

لو انتى اللى انا قصدى عليها حتفهمى الكلام دة

ولو انتى مش اللى قصدها يبقى حصل خير بالحمة المفرومة

وانا محظوظ انى اتعرفت عليكى

بس بجد لو صح اللى فى بالى

يبقى والله وحشتينى جدا

اخوكى

احمد الشاعر

elsha3er said...

نهر الحب
اهلا بيكى

تصحيح صغير انا اسمى احمد

وشكرا لكلامك الطيف دة

اما عن التعليقات لا طبعا مش تطفل دة من حقكم عليا وبعدين ما فيش بين الاخوات تطفل

نجم انا بحبه جدا وشايف ان هو شاعر بجد

هتلر الكل افترا عليه لانه حرق اليهود واتهم بالخيانه فى المانيا مع انه كان بيحاول يصلحها بعد الازمة العالمية عام 1929
اما عن حرق اليهود فقال هتلر فى كتابه كفاحى
كان بأمكانى احراق كل اليهود ولمنى تركت حفنة منهم لتعلموا لماذا احرقتهم

موشى ديان انا بكرهه كرجل مسلم وعربى لكن ايه المانع انى اعجب بشخصيته واحاول اقلدها واستخدمها فى الخير مع تطبيق الاسلام ودة اقتباص من الغرب لكن فى الخير

محمد على باشا
بجد مثال يحتذى به كملك او رئيس انا عن نفسى بحب سياسته جدا هو صحيح وصولى وقتل اللى وصلوه فى الحكم لكنها السياسة
وعجبنى اكتر سياسة توحيد البلاد مصر والسودان والشام وهكذا متحديا الضغوط الدولية الى ان رضخ لها ودة العيب الوحيد الراجل دة كان ممكن يغير خريطة العالم

جمال عبد الناصر
رئيس من زاوية واحدة كان نصره فى المعارك نصر سياسى وخسارة عسكرية ودة مش مطلوب وجميل انه امم القناة ولكن سلبياته كتيرة يكفى محاولة قضائه على الاخوان وتقيد حريتهم ظهور بعض الفساد السياسى داخل مصر فى عهد عبد الناصر دة غير الهزايم العسكرية
بسبب الثقة الزايدة فى قواده زى عامر

مصطفى كامل
اعتقد واضح دور هذا الرجل فى مصر الا ما كنوش قتلوه

موسلينى

طاغية ايطاليا يكفى الحكم الديكتاتورى وما فعله بمعارضيه فى ايطاليا الى جانب مذابح الحبشة فى عهده
وتحياته لعصبة الامم

نجيب

الرئيس المختفى من التاريخ اللى حاول الكل محو زكراة وقليل لما حد يتكلم عنه مع ان الراجل دة هو الثورة اساسا
فأن نسوه انا اتذكره

غاندى

رجل يقول ان الخطر الحقيقى على الهندوس هو المسلمين
ويكفى قتل قرى بأكملها للمسلمين على يد سفاركار
يبقى ليه احبه

فاروق الاول
احنا كتب التاريخ مصوراة الرجل الفاسد اللى مش خايف على مصالح بلده مع ان فاروق كان بيحب مصر جدا هو بس كان صغير فكان ناس تانية بتتحكم فيه وفى فكره
ويكفى عندما قامت الثورة وحوصر قصره وبدأ الجيش وحرسه يطلقو النار طلب من الحرس انهم يوقفو الضرب وقال احنا كلنا مصرين وخاف لحد من هنا او من هنا يموت

الاخوان

لا تعليق انا بس مش بحب فكرهم ليس اكتر

السادات

بحبه اوى اة ليه سلبيات وليه اجابيات بس بحبه ومش عشان 73 بس لا والله دة له حاجات تتقال فى ميت كتاب

سعد زغلول

رجل سياسى فاشل لم يستطع فى اى مؤتمر ان يحصل لمصر شىء واحد عكس مصطفى كامل
بالاضافه لحياته الشخصية اللى بجد فيها حاجات ما تتقلش

عائلة الرئيس

مش محتاجة اوضح

السلطان عبد الحميد2

اخر الخلفاء الاتراك
ويكفى محاولة اصلاحه للجيوش وتطويرها
ومقاومته للأنكشارية الطاغية
ومن بعده من السلاطين قد تفشى فى عهدهم الفساد والرشوة وضعف الجيش

تحياتى


احمد الشاعر

brave heart said...

هههههههههههههههههههههه
انا يا سيدى
واللهى انا
ازيك
عامل ايه
كويس انك فاكر
وانت كمان واللهى
يعنى حبيت اعملهالك مفجاه
استنى عليا لسه المفاجأت جايه كتييييييييير ده بس عشان فى الاول
بس بجد برافو عليك اوى
لا اله الا الله
اختك
:)

elsha3er said...

brave heart

نيرة

والله من اول تعليق ليكى كنت حاسس ان انتى والله وحشانى جدا بس مفجأة جامدة جدا صحيح انا حاولت اعلق عندك بس مش عارف وصلت ولا بالله عليكى حاولى تغيرى نظام التعليق عندك وتخليه عادى

تحياتى

اخوكى

احمد الشاعر

brave heart said...

وصل يا سيدى التعليق
شكرا
عموما هحاول اغير النظام بس كده كده مش هنزل حاجة جديدة خالص دلوقتى
فمش مشكله يعنى
بس اما انزل ان شاء الله هحاول اغيرة
المهم
انت ردك على سؤالى بتاع عملت ايه فى الامتحانات مش مريحنى خالص
هاه
قول
عملت ايه
ربنا يستر
ان شاء الله خير
مودتى
لا اله الا الله

brave heart said...

انا بس عامله مراقبه على التعليقات
:)

brave heart said...

معلومة جديدة خالص
انا كتبت موضوع جديد عايزاك تشوفه معملتهاش مع غيرك يا احمد لازم تروح المهم ياريت متتهربش مكن سؤالى بتاع الامتحانات
اختك
:)

شمس النهار said...

ايه ياريس العوده القويه دي
عماد مين ده اللي هتوديه في دهيه
حمد الله علي سلامتك
وماتغبش تاني

انى احبكم فى الله said...

بجد المدونه تستحق التقدير وعاوزة اقولك حاجه شكل رايم من رايى لانى عامله موضوع عن هتلر ناس كتير عارضونى ياريت تبقى تبدى رايك فى الحكايه دى وكمان بشكرك على الحوار الجميل ده ههههههههههه

م/ الحسيني لزومي said...

اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها

saragebaly said...

هههههههههههههههههههههههههههههههههههههههههههههههههههه

جميلة جدا جدا يا أحمد

ربنا يرحم عماد

دمت بكل الود

سارة

نهر الحب said...

احمد الشاعر
شكرا لك بجد اهتمامك بالرد كنت احبة اوى اعرف وجهة نظرك فى التعليقات اللى حاططها وشكرا لك اجبت بأجادة رغم اختلافى معك فى بعض النقاط
لكن تناولك جميل وبه فكر عالى
احترامى وتقديرى
اعتذر عن الخطأ فى الاسم
نهر الحب

mahasen saber said...

ايه ياشاعر انتا من غيبه لغيبه

رحت فين يا احمد اتأخرت عن البوست الجديد
يا رب يكون التاخير سببه خير

dido said...

السلام عليكم
احمد بسم الله ما شاء الله عليك
وقال بتقولك غيابك اثر ع طريقتك في الكتابه انت بتخزي العين عنك ولا ايه
بس هو مين اللي قالك انه مات ههههههههه
سلاااااااااااااااااااااام