سألونى مين أنت
قلتلهم صغير أنا فى سنى
لكن عجوز شابت أحاسيسى
وبالرغم من الشيبة
وطقطقت الشعور البيض
فاتح أنا شيشى وفاتح ترابيسى
قلتلهم أنا أنسان
وحيد أنا فى حالى
سعادتى جوايا وأحزانى جوايا
وليد ما شاف النور
أفرح يمطر سحاب جوفى
ويرقص قلبى ويايا
أحزن يثور قلبى ببركان خوف
وسيل من الدمع ماله نهاية
ماليش فى الدنيا غير نفسى
وكان نفسى يكون ليا بقربى حبيب
لكن مليت دموع عينهم
لكن مليت الرعشة فى مناديلهم
فى يوم لحظة ما أودعهم
أصلى كتير الحيرة والغربة
حتى وأنا مابين ناسى
تنام الناس
وأسهر وحيد انا وقمرى
نكلم بعض بالأحساس
أغمض عينى
أشوفه لما يحكيلى ويشكيلى من الوحدة
برغم النور أشوفه يتوه بين السحاب
أطيب خاطره بالكلمة
دة اللى مابينى وبينه دوا
وعلى شفايف الهوا النادية
بيبكى الناى بعزف جميل
على حالنا
ونشد ترحلنا
وألقى الحب فى طريقى
أخاف منه بعيد أجرى
ويملك خوفى وجدانى
أخاف لينكسر قلبى
وتزيد عليا أحزانى
أخاف ليخرم الهوا ودنى
لقلب بحلق الحب يوعدنى
وفى الاخر يقوم يهرب ويجرحنى
ما ينوبنى منه غير وجعى
ودمى يسيل
أنا يا سادة سجين خوفى
وأفكارى وأيامى
سجين ندمى وأحلامى
لكن سجنى ما منعش ان حبى يزيد
28 comments:
السلام عليكم
لو فى بعض التركيبات فى الجمل مش واضح معناها العام انا ممكن اوضح اللى يحب يستفسر
عارف يا احمد البوست ده كنت تسميه ايه ... رحله الم ...طبعا دى حريه واحساس اكتر بس حبيت اعبر عن احساسى بالبوست مش اكتر
عجبنى جدا وقريته اكتر من مرةوعجبنى اكتر خوفك على قلبك لينجرح من الحب
.............
وألقى الحب فى طريقى
أخاف منه بعيد أجرى
ويملك خوفى وجدانى
أخاف لينكسر قلبى
وتزيد عليا أحزانى
عارف... الخوف اللى بيملى القلب ده لانه خالى
جميل جدا والبوست كله بيكمل بعضه لنفس الرحله
تسلم يا شاعر
سألوني ما هويتي قلت لهم انسان يفتقر الى التقدير رغم تقديره لكل البشر
رائع أن أجد تلك الكلمات بالرغم من مرها وحزنها تحتوى الأمل بداخلها
دام حبك
أحييك
:)
معنديش كلام اقول غير انك اجزت و عبرت فاحسنت
السلام عليكم
احمد
القصيده تحفه
ومؤلمة وحزينه اوى
:(
انا حبتها بجد
خاصة اخر جزء
أنا يا سادة سجين خوفى
وأفكارى وأيامى
سجين ندمى وأحلامى
شد حيلك الامتحانات عالابواب
:)
نيرة
لا بجد جميله وجمدا:)
لا بجد جميله وجمدا:)
السلام عليكم....
حلوة اوووى يااحمد عجبتنى كذا جملة بس انان بعلق ع السريع حرجع تانى واقولك اية الى عجبنى اووووى
فى حلو الحوار مع القمر
دومت مبدع
فى رعاية الله
shemo
لو جاز لي او سمحت لي الكلام راااااااائع بس شيل يخرم ودني دي
وتصويرك للخوف من الحب جميل جدا
الحب مش فيلم رعب
بس نختار صح
والمشكلة ان ماحدش بيختار الصح
:))
"
تنام الناس
وأسهر وحيد انا وقمرى
نكلم بعض بالأحساس
أغمض عينى
أشوفه لما يحكيلى ويشكيلى من الوحدة
برغم النور أشوفه يتوه بين السحاب
"
وربنا تحفة يافنان وانا قليل لما اعلق عند حد وانعته باللقب ده تسلم ايدك ياشاعر
لولا
وكان نفسى يكون ليا بقربى حبيب
لكن مليت دموع عينهم
لكن مليت الرعشة فى مناديلهم
فى يوم لحظة ما أودعهم
........
الخوف من الحب دليل على رقة مشاعرك واحاسيسك المرهفه فأنت تخشى أن تتالم أو أن تجرح أو يجرحك أحد
لكن الحذر لا يمنع القدر وكما يقولون " اللى يخاف من العفريت يطلعله "
ادخل التجربه بقلب جااامد وحاول تختار صح وراعى ربنا وبعد كده ماتخافشى
لان لو خوفنا واستسلمنا لخوفنا مش هنتعلم حاجه من الدنيا
لازم نقع عشان نعرف نقوم
جميله كلماتك يااستاذ أحمد
سعيده بوجودى هنا :) :)
تحياتى
gogo!sf
ممكن بس انا عن نفسى مش حاسسها انها الم عادى يعنى يمكن لانه تعود وفعلا الاحساس اكيد بيختلف من شخص لاخر
مش لازم يكون فاضى والله بالعكس انا بحب كل الناس وبعاملهم بحب كبير مش لازم يكون حد معين مستحوز على الحب كله يكفى حب الناس احيانا حتى اشعار اخر برده دى وجهة نظر ما تعبرش الا عنى
تحياتى
فارسة بلا جواد
أهلا بيكى دايما الامل موجود ما ينفعش فعلا نعيش من غيره
المصوراتى
منورنى يا محمود يكفى وجودك بس بالدنيا والله
أختى الغالية نيرة
اولا وحشانى جدا
ثانيا ميرسى على مجاملتك اللطيفة
ثالثا امتحانات اية بقى ما خلاص انا خلصت انا دلوقتى عندى تلاميذ عندهم امتحانات هههههههه
دايما منورانى
ابقى طمنينى عليكى من وقت لتانى
sony2000
منورانى يا سونى ربنا يكرمك دة من بعض ما عندكم
shemo_ joker
أهلا وسهلا بحضرتك
الحمد لله انها لقت قبول عند حضرتك مشرفانى
تحياتى
شمس النهار
ماما شمس اهلا بيكى
يخرم ودانى دة جاية من مثل على طول بتقوله الستات فى مصر خصوصا عاجبنى بيقولوا لما حد يعشمهم بشئ وعدنى بالحلق خرمتله ودنى
فا انا بس صيغته خايق هوا الحب يخرم ودانى لشخص يوعدنى بحلق الحب
الحب مش رعب لكن الحب اخره جواز يبقى لازم نختار وحضرتك قلتى كلمة حلوة اوى يا أمى
المشكلة ان ماحدش بيختار صح فا انا شايف انى مش حعرف اختار يبقى كفاية حب الناس واعمل حاجز نفسى بينى وبين اى حب تانى بالتخويف هههههه
لولا وزهراء
اهلا بحضرتك نورتى المدونة دة شرف ليا يا فندم والحمد لله انها لقت قبول عند حضرتك
دعاء العطار
اهلا بيكى اول زيارة للمدونة لكن ان شاء الله حيكون فيه تواصل
والله ما هو عشان اراعى ربنا يبقى برده اكتفى بحب الناس لان كل شخص بيبقى عارف نفسه وانا شايف نفسى صغير يمكن شياي فى سنى واصغر بيحبوا وكدة لكن انا عارف نفسى انى مش مستعد اشيل مسئولية يبقى لازم فيه سياج او حاجز نفسى يخلينى اكتفى بس بحب الناس كل الناس
تحياتى
خليط جميل من رصاص الاقلام اللى كتب بيها الفاجومى و الابنودى وسيد حجاب و غيرهم
نفس القلم الرصاص الجميل
تحياتى
"جميلة كلماتك عنك ووصفتك كويس تسلم على الابيات الجميلة وصياغتها رائعة"
لولا
قلتلهم أنا أنسان
وحيد أنا فى حالى
سعادتى جوايا وأحزانى جوايا
وليد ما شاف النور
أفرح يمطر سحاب جوفى
ويرقص قلبى ويايا
أحزن يثور قلبى ببركان خوف
وسيل من الدمع ماله نهاية
ماليش فى الدنيا غير نفسى
وكان نفسى يكون ليا بقربى حبيب
لكن مليت دموع عينهم
لكن مليت الرعشة فى مناديلهم
فى يوم لحظة ما أودعهم
أصلى كتير الحيرة والغربة
حتى وأنا مابين ناسى
تنام الناس
وأسهر وحيد انا وقمرى
نكلم بعض بالأحساس
رغم ماتحمل تلك الكلمات من الشجن إلا أنها تعبر عن وبصدق عن ماتحمله القوب وتجسده الأرواح من الآلم والمعاناه
تحياتي
فاكرة إني كتبت تعليق على البوست دة كتيــــر.كنت تقريبا قبل او بعدشمس النهارعلطول!!بس مش لاقياني :)ومش فاكرة غير إن الكلمات كانت عاجباني اوي اوي وكتبت تعليق طويل عريض
:)
بس بجد الكلمات وموسيقتها جميلة
كلام رائع
بالرغم من انه مش موزون في القافية بس احساسه مسترسل و ده اللي محليه
أحييك
أفنان محمد المغربي
مفيش انسان بيتخلق جواه كره ابداااا
الظروف اللى حواليه هى اللى يتخليه اما يحمل كره اما حب
ولكن حتى اللى جواه كره كبير
بيكون برده جواه حب كبير
لان الانسان مينفعش ابدا يعيش بدون حب حتى لو كله احزان
الحب سواء حب الناس الاصدقاء العيلة الحبيب ضرورى لاى حد
تحياتي
مؤشرات الاسواق العالمية مباشرة
Post a Comment