وانا ان شاء الله حا تبعكم كل يوم جمعة وانزل فى البوست
انا بهدى التدوينة دى لى المدونة اكون او لا اكون لان اصل الفكرة بتاعتها وكانت الفكرة انى اكتب عن حد بيحب حد ومش عارف يقوله بس انا كتبتها بطريقة انا حببها ويارب تعجبكم
هى اغنية ولو ربنا شاء حنزلها فيديو بالحن بتاعها
تصورى
تصورى خفت اسرح فيكى اجرح رقتك
تصورى خفت افتح قلبى تهرب ضحكتك
تصورى انى بتمنى ابقى جنبك
عمرى كله افضل احبك
منى مش راح تهربى
تصورى
قلت يمكن حب شارد بالخيال
ولا بس عنيا بتحب الجمال
قلت جايز ايوة جايز احتمال
بس منى مش راح تهربى
تصورى
احمد الشاعر
www.elsha3er1.blogspot.com
69 comments:
ابني احمد
اولا مبرووك على العمل ربنا يثبتك اللهم امين ويجعله خير عليك
ثانيا كلماتك رقيقة ووبتعبر فعلا
عن فكرتك
تسلم ايدك يا احمد
وفي انتظار جديدك كل جمعة
ربنا يصلح حالك
مبروك علي الشغل
وبجد الاغنيه تهووووووووووووووووووس
وحساها اوي
مبروك الشغل يا شاعر ....
.......
كلمات فوق الخيال ....
بتسحر بجد....
......
دمت بخير
الف مبروك علي الشغل
يعني نمسح أسمك من قائمه العاطلين يعني
ماشي ياعم يابختك
أغنيه جميله يا أبو حميد
ودايما متألق
تحياتي
رائعه ...
تسلم يا آحمد على الاهداء
انت ترجمت الفكره باسلوب رقيق جداً...
فنان حقيقي!!! ...
بس كده خليتني في موقف صعب... عارف ليه؟ لان الكلمات اللي كتبتها مش سهل يترد عليها... لجمالها...
بس انا برضو حاخد وقتي ... علشان ااقدر اكتب شيء قد المقام.... ههههههههههههههههههههههههه
الى اللقاء....
أغنية مميزة لقلم أكثر تميزا
كلماتها و رقتها عجبتني أوي
دمت مدونا رائعا
صديقى العزيز
عمل جميل للغاية
جايز ايوة جايز احتمال
بس منى مش راح تهربى
ولو احتمال بالنفى
يبقى ايه الموقف
تحياتى
كلمات رائعة
وأحاسيس راقية
تقبل تقديرى
السلام عليكم
بارك الله لك في عملك الجديد ورزقك من طيبات الحلال أخي الفاضل
بجد إحساس رائع وأسلوب عذب سلمت يمناك
في إنتظار إبداعاتك ياشاااعر
تقبل مروري وخالص إحترامي
اولا مبارك عليك الشغل
ثانيا بقى بجد الكلمات جميله قوى بجد
و منتظره الفيديو مع اللحن ان شاء الله
(:
ايه يا شاعر الجمال ده
بجد والله هتبقى اغنيه تحفه
رائعه كلماتك بجد
مع تحياتى
تسلم اديك
أحيانا يكون البوح بما في القلب يأتي بأثر عكسي
ويهدم شئ جميل بين اثنين
فيرجع بلوم على النفس
قائلا
ليتني صمت
كلمات رقيقة
مبروك عليك الشغل
تقبل مروري وتحياتي
سارة
مبروك على الشغل
وربنا يسعدك
تصورى بجد كلمات رائعة دمت مبدعا
تحياتى
اولا الف مبروك على الشغل
ثانيا كلامك رائع جدا وعجبني خاصة الجزء ده
تصوري اني بتمنى ابقى جنبك
عمري كله افضل احبك
مني مش راح تهربي
تحياتي
تحفه يابو حميد
حلوة بجد
ومبروك على الشغل
بس ملحوظه صغيرة من اخوك الكبير
قلت جايز ايوة جايز احتمال
دى صعبه لأن جايز واحتمال نفس المعنى وتكراراهم 3 مرات فى شطر واحد صعب شويه
تحياتى لإبداعك لأن الأغنيه دى عجبتنى اوى بجد
الف مبروك والي الامام دائما
اولا كويس اننا حنشوفك كنت خايف اننا منشوفكش من مرة
ثانيا مبارك عالعمل الجديد وان شاء الله لتطور وترقي كبير في المينا
ثالث الاغنية جميلة جدا وعن جد بتعبر عن حد بيحب حد ومش عايز يقولوا المهم انوا بيحبوا وبيخاف يجرح مشاعرة
والمهم اكتر انوا اكون او لا اكون مهداة الها لانها صاحبة الفكرة الجميلة
مبروك يا عم علي الشغل الف الف مبروك
وتصور بقي الاغنيه جميله فعلا ياله ربنا يوفقك بقي بس خالي بالك بقي
وبعدين لو حد بيحب حد ميروح يقوله واجره علي الله
او يقولها ويروح حاطط ايده علي قفاه ومغمض عينه خوفا من رد الفعل هههههه
بهزر
بجد تسلم ايدك فكره واغنيه جميله وربنا يسعد الجميع
سمكه
اها متصوره
(:
يعنى روحك انتا وكونه على البوست يبقى لازم يبقى تحفه
وتبقى اغنيه رائعه اصلى عارفه احساسك راقى ازاى
وعارفه كونه احساسها وفكرها واصل السما ازاى برضه
حلوة اوى لو سمحت سلملى على اسكندرية كتير:))))
ماما امولة
بجد فرحت جدا بكلمة ابنى احمد
واسمحيلى اقولك امى اهلا بيكى
الله يبارك فيكى
وشكرا على المجاملة اللطيفة دى
احمد الشاعر
كيارا
اهلا منورانى
الله يبارك فيكى
الحمد لله ان الاغنية عجبتك
احمد الشاعر
m k
دايما زيارتك بتزدنى شرف
الله يبارك فيكى
وشكرا على المجاملة الرقيقة منك
احمد الشاعر
خالد فودة
اهلا بيك
والله يبارك فيك يا حبى
بس هى بعد العيد وارجع عاطل تانى عشان الامتحانات والمذاكرة
احمد الشاعر
اكون او لا اكون
الاهداء دة حقك لانك انتى صاحبة الفكرة
وانا متأكد انك حتعملى حاجة اجمل من كدة انا واثق فى قدراتك جدا
وانا مستنى
احمد الشاعر
قطرات من شواطىء الحياة
اهلا بيكى
انتى بجد كسفتينى مش عارف اقول اية
شكرا لرقة كلماتك
احمد الشاعر
الازهرى
اهلا بيك
شكرا لكلامك
بس انا مش فاهم يعنى اية بالنفى
احمد الشاعر
محمد الجرايحى
شكرا ليك
ولمجاملتك الجميلة دى
وارجو ان نكون على تواصل
احمد الشاعر
حور الجنة
ربنا يخليكى ليا يارب وبجد انا مبسوط اوى لتعليقك
وشكرا ليكى
احمد الشاعر
ضد التيار
الله يبارك فيكى
منورانى والله
وانا والله بدور على حاجة اعرف ارفع بيها الفيديو ومستنى اللى حيعزفلى على الجيتار وان شاء الله احاول انزل الفيديو
احمد الشاعر
حسام وريمان فى هاكونا مطاطا
دة من بعض ما عندكم والحمد لله انها عجبتكم
تحياتى
احمد الشاعر
saragebaly
اهلا بيكى فعلا عندك حق انا معاكى فى اللى انتى قلتيه
اتمنى ان نكون على تواصل تحياتى
احمد الشاعر
mohamed ghalia
منور والله
والله يبارك فيك وشكرا لكلامك الجميل
احمد الشاعر
دينا حامد
مشرفانى والله
الله يبارك فيكى
انتى عجبتك الجزء الاول من الاغنية
بس كدة الجزء التانى حيغير
تحياتى
احمد الشاعر
blue-wave
دكتور اهلا بيك منور والله
دة من بعض ما عندكم
وفعلا انا ما كنتش واخد بالى من الحكاية دى عندك حق
شكرا ليك
احمد الشاعر
حسن حنفى
منور يا ابو على
الله يبارك فيك والى الامام لى وليك
احمد الشاعر
عابرة
اهلا بيكى لية مش حتشوفينى وانا اقدر ابعد عنكم من غير ما اقول وبعدين خلاص انا بقيت متعلق بيكم كلكم
وبعدين انا قبلت الشغل دة عشان لما توصلى مصر اكون انا اول واحد فى استقبالك احنا مش اتفقنا على كدة
تحياتى
احمد الشاعر
سمكة واحدة
اهلا بيكى
احلى حاجة فيكى انك عارفة رد الفعل شكلك كدة عملتيها فى حد
دة الواحد يخاف منك
احمد الشاعر
esraa
تعليقاتك غريبة بس بتعجبنى اوى
احمد الشاعر
mahasen saber
اهلا بيكى منورة
وربنا يخليكى لينا
كفاية فعلا ان اكون او لا اكون صاحبة الفكرة
احمد الشاعر
princess
اهلا بيكى وشكرا لمجاملتك
واسكندرية بعتالك الف سلام واهلا بيكى فى اى وقت فى اسكندرية واحنا نستضيفك كل المدونين السكندريين
احمد الشاعر
بيقولوا العتاب دليل المحبه يا سيدى وانا جيت اعاتب واوى كمان على الغياب دا وبعدين لقيت اخبار حلوه وشغل جديد اتكسفت وببص كده لقيت كلام حلو من كلامك كالعاده طبعا ولو كل الشباب بتوصف وتتكملم كده كان الدنيا بقت سووووووووو رومانتك.
مبروك على الشغل..وبالتوفيق يارب ربنا يوفقك ويسعدك ويحقق احلامك.
لولا
ايه يا عم لا بالراحة والنبى
جامدة اوى اوى بجد مش عارفة اقولك ايه غير ان رائى فيك لسة متغيرش
انا مكنتش باجى عشان الامتحانات والكمبيوتر كان بايظ
بص بأة انا مش هقول انا مين
متخلينيش اغير رائى فيك
لو معرفتش انا مين هقلب الموازين
ههههههههههههههههههههههههه
على القافية بس
بتمحك فى الشعراء شوية
رخامة
عندك مانع والا حاجة
بجد لو قلت انا مين ممكن .................. اعزمك على واحد شاى واوصلو بالواد بلية لحد مدونتك
اوكى
اتفقنا
ماشى
سلامات يا شاعر
بقولك اييييييييييييه
انت لسة مرديتش
على فكرة انا الى غلطانة
سيبتك كتيييير مكن غير ما اوريك وشى
فاتعودت
هاه
مفيش شاى خلاص
لا واللهى مفيش
انت لازم تتابع المدونة اول باول مش ممكن انا اجى فى اى لحظة والا ايه
مفيش حاجة هعملهالك وهتقول انا مين بردو
عقابا ليك بأة عليك 2 شاى و3 كابتشينو و4 بيبسى و5 شيبسى و2 مولتو و9 بيكرولز
ايه
متستكترهمش
دة انت صعبت عليا فخففت العقوبة عنك
يالا بجد بأة انت اتأخرت
احتمال مدخلش قريب
سلام
غير معروف
ازيك يا نيرة والله وحشانى جدا بس انا مش حعرف اجيلك عشان انتى ما كنتيش تعرفى ان المدونة القديمة اتمسحت غصب عنى وكل الناس اللى كانو بيعلقو عندى راحو وجبت اللى اقدر علية ابقى علقى اى تعليق بأسم مدونتك عشان اعرف ادخل عليها
بس انا مش حتنازل عن الشاى والنسكافية
تحياتى
على فكرة انا عمرى ما انساة الناس اللى حبتهم وحبونى
احمد الشاعر
لولا
اهلا بيكى وشكرا لكلامك الرقيق دايما تعليقك بستناة
وانا اسف جدا على التأخير وانا جاى حالا
وبعدين مدونتك دى مدونتى والعكس
احمد الشاعر
بص بقى انا هقول التعليق اللى انا شايفاه بس من غير زعل
مش عارفة حاسة انها مش راكبة على بعضها
يعنى كلمة "تصورى"عاطيانى احساس ان مشاعرك دى كتيرة عليها اوى وكأنك بتقولها شوفى الهنا اللى انتى فيه
برافوووووووووووووو
شطور
كويس انك لسة فاكر
وعندى الشاى والنسكافية
وهعلق باسم الدونة قريب
نيرة
ابو حميد حبيبي ... الله ينور يباشا على الاحساس العالي والرقه الانهائيه
تحياتي الى المبدع
خفت اسرح فيكى اجرح رقتك
عجبتنى أوى أوى الجملة دى
بس أنت مش معايا أنها لو اتعملت أغنية محتاجه تطول شوية ؟؟
تحيات خاصة يا بلدياتى
أه بينى و بينك كده , من غير ما حد ياخد بالوا " تسلم ايدك
موناليزا
منورانى والله
على فكرة انا عمرى ما ازعل من حد حتى لو غلط فيا شخصيا
بس بجد انتى ضحكتينى جدا على كلمة انى محسسها اية الهنا اللى هى فيه اولا انا منكرش فعلا ياسعداها ياهناها دى مش مع اى حد دى مع الشاعر هههههههههههه
انا بهزر على فكرة بس ممكن تكونى انتى حساها كدة طب لية ما تقوليش ان انا اللى مش مصدق انى جنبها مثلا
شرفتينى يا موناليزا
سلام
احمد الشاعر
نيرة
اهلا بيكى كلاكيت تانى مرة
انا قلتلك عمرى ما انسا حد وقف جانبى وانا شايف ان انتى من الناس اللى المدونة دى اتولدت على ايديهم
فا عمرى ما انساكى
وانا مستنيكى
احمد الشاعر
عماد الدين يوسف
والله وحشنى جدا جدا وشكرا لزيارتك اللى عندى تسوى الدنيا كلها
احمد الشاعر
سارة نجاتى
تصدقينى لو قلتلك انى لما بكرر الجملة دى على مسامعى جسمى بيترعش واحس بخطفة قلب والله العظيم دة اللى بيحصل
بجد انتى جيتى على الجرح يعنى
لا هى مش محتاجة تطول لان التوزيع مطولها ولو شاء ربنا حنزلها فيديو
بس مستنى جيتاريست كويس
احمد الشاعر
اة صحيح يا سارة
انا اكبر منك يعنى انتى اللى بلدياتى على فكرة لان انا موجود فى البلد دى قبليكى
وش مطلع لسانه
تسلم ايدك انتى اللى علقت وازدتينى ثقة بنفسى
احمد الشاعر
و ايش عرفك بقى يا فالح أنك أكبر منى ؟
بتلم عنى معلومات بأى طريقة , مش منولهالك يا سى يا أحمد
و بعدين يا أخويا " تسلم ايدك" تتقال لك أنت يا يا عم الشاعر أنت
سارة نجاتى
لا من غير ما تقوليلى انا عرفت من مصادرى الخاصة انك اسكندرانية وانك اصغر منى سنا ولو تحبى اقولك فى سنة كام اقولك انا فوق خيالك على فكرة
احمد الشاعر
ده على أساس أنك ناصح يعنى ؟
طب أنا عارفة أنت عرفت منين
بتقرأ تعليقاتى فى المدونات التانية , بس كده , لأن لو عندك مصادر فعلا ما تقولى بدرس ايه؟؟ , أهى دى بقى مقلتهاش على و لا مدونة .
و بعدين يا ذكى , لما أبقى أصغر منك بسنة , و أنت فى تانية , يبقى أنا فى ايه ؟
و ده مخلنيش أعرف ايه سر اهتمامك برده ؟
برده مش منولهالك
سلام
الشاعر
بين حنيايا أحرفك الماسية
تسربت أحلى معانى العشق
فشكراً لك على بوحك الراقى
و إحساسك النقى كنقاء كلماتك
دمت نورا للجميع
بكل الخير و الصحة
تقبل ودى و تقديرى الأكيد
Angel Love
مبروك الشغل وربنا يوفقك وينور لك طريقك إلى كل خير
انت تسأل والكمبيوتر يجيب
شكرا لك
احمد الشاعر
سارة نجاتى
انا حريحك وحجبلك من الاخر
انا مش مهتم ولا حاجة وبعدين انا مش فى تانية
وما بتبعش ردودك ةلا حاجة مش فاضى انا بقى عشان ادور على ردودك عشان ابين انى عارف عنك كل حاجة
كل الحكاية انى اعرف حد يعرفك شخصيا بس كدة
يعنى مش بطاردك وممشى وراكى المفتش كولومبو ههههههه
سلام يا بلدياتى
احمد الشاعر
angel
اهلا بيكى منورانى فى اول زيارة وارجو ان لاتكون الاخيرة وان نكون على تواصل
بس بجد تعليقك ليا خلانى تنحت انتى خلتينى احس انك انتى اللى أبدعتى مش انا شكرا لتعليقك الرقيق دة
احمد الشاعر
angel
ربنا يخليكى ليا يا أختى الغالية
احمد الشاعر
أنا جدعة جدا و ناصحة جدا(سيبونى أفرح بنفسى بقه) , و ابقى احترم دماغى يا بابا
طبعا أنا عارفة انك لا بتدور و لا أنا قلت الكلام ده فى التعليقات أصلا و أنا كنت عارفة أن فى حد قالك , بس ح أجيبه ان شاء الله
بس سيبك انت بتوقع فى الكلام بسرعة
أما بخصوص كولومبو
فراحت عليك خلاص
Post a Comment