السلام عليكم اولا هذا الموضوع لا يعبر الا عن رأى كاتبه القصيدة بعنوان على لسان سيادته يارب تعجبكم
على لسان سيادتهابين زين ابين .......وابص فى الفنجان..
واشفلك الابراج......واجفف الوديان...
واعمل عمل مسوجر......ينطح ولا الجديان
وازود البطالة.....وادمر الجدعان.....
واخلى الفقير شبعان.....واخلى الشبعان جعان.....
ابين زين ابين.....وابص فى الفنجان.....
وابهدل الشجعان.....واخلى الشجاع جبان......
والحى يموت من خوفه......وفى كله انا الكسبان
وحعمل اللى اشوفه......واتفرجه من الان....
ابين زين ابين ......وابص فى الفنجان......
وحبررلك يا شعبى......قد اية انا غلبان....
الناس اللى معتقلها .......دى ناس ما لهاش امان
حتبوظ النظام......وتدمر المكان.....
ويقولو مصر بايظة .......وبالارهاب المكان مليان
واخسر الخصخصة.......وتخطيطى بتاع زمان
ويرفض الاجانب .......يعدلو فى الميزان
عرفت قد اية....... ياشعبى انا غلبان....
وحقولك حاجة تانية......وشوف مين الغلطان
لو كنت زعلان على رفح.......واللى فيها واللى كان
تعالى معايا شوف......قد اية انا زعلان
انا برده ياشعبى زيك.......عربى ووطنى من زمان
بس ما بليد حيلة.......دة رأى الامريكان
احبس فلان دة احبس......فى اللحظة والزمان
قالولى يوم ياحسحس......اقفل حدودك يامان
قلتلهم واسرائيل.......قالولى زيك كمان
اتاريهم حيبهدلوهم........ويحبسوهم فى المكان
راح دقت العروبة........وفى قلبى جه الحنان
وجربت يوم اساعد.......وأغير اللى كان.
وابعت لقمة هنية.......للست والعجزان
وفنطاز مليان فى مية.......نروى بيها العطشان
او حتى بطنية.......ندفى بيها السقعان
وفجأة سمعت خبر......فى نشرة البيان.
ال منعت المعونة .......بأمر الامريكان
سبيت ابو العروبة.......وقلت انا كدة خسران
وقلت المعونة اولى ......من فلسطين والكيزان
يغوروا هم فى داهية.......خلى المعونة تبان
اروح اصيف بيها........ونقط على شعبى الغلبان
بالزمة كدة يا شعبى......اكون انا غلطان
ابين زين ابين.......وابص فى الفنجان
احمد الشاعر
www.elsha3er1.blogspot.com
56 comments:
مش ممكن قصديه كوميدي جدا
شكلك هتشرف في شوف انت تحب تكون فين
طره والاالمزرعه والا الحربي مع بتوع شغب الكوره
شوف نفسك في ايه ياريس شاعر
بس قصيده حلوه حلوه جون يعني
أهلا يا شاعر
شكرا على سؤالك
و الله أنا مطمرتطة أوى و الله ما عندى وقت حتى أتفرج على نفسى فى المراية
القصيدة تحفة و على فكرة ضحكتنى اوى
أنت بجد محصلتش
قصيدة جميلة وكلها حقائق عن اللي اسمه ***
شكرا
N@B!L
www.nabil-space.blogspot.com
انا تعبت بجد تعبت هو كله اخبار تقتل كده
مفيش حاجه تفرح
اسلوب حلو بس الكلام يوجع
ههههههههههه
دايما بكون معجب باللي سيادته بيقوله وكمان غصبن عني
:)
يا شاعرنا..
دائما تتحفنا بأفكارك...
الشعريه...
............
دمت بخير
ازيك يا نجم
بص بالنسبة للقصيدةهي حلوة بس انت محتاج تظبط الأوزان شوية
حاول تقرا شعر فصحي كتير شعر من القديم اللي بوزن وقافية ليس شعر النثر الحداثي هذا حاول كمان تقرأ في علم العروض
- كلمةبقي وياريت تقبلها مني انت بتقول على السايد بار ياعم احمد بحبك وياريت ابقى زيك .. بص ياعم حب اي حد زي مانت عايز لكن خليك نفسك انت
اكتب بطريقتك انت وبروحك انت وبأحساسك ومشاعرك انت ماتبقاش نسخة من حد
كمان مايبقاش كل طموحك تبقي زي فلان لاء لازم حلمك انك تبقي احسن منه وتتفوق عليه وتسبقه بمراحل مهما كان مين الشخص دة والمكانة اللي وصل لها
ماتخليش لطموحك سقف احلم انك توصل للقمر وتمسكه في ايديك ولو قدرت تعديه عديه
ياريت تتقبل رأيي
وسلامي وتقديري لك
شمس النهار
طبعا سيادتك منورة مش شمس النهار فا اكيد منورة
اما عن المعتقل والله ما تفرق ما انا كدة كدة حضرب
احمد الشاعر
فركشاوى ناوى
ياسيدى اأمر بس
احمد الشاعر
انا ودماغى
اهلا بيكى والله انتى غريبة انا وغيرى لما دخلنا الكلية عشنا حياتنا مش عارف ازاى يعنى انتى العكس حاولى ما تحسسيش نفسك انك تعبانة دايما وانك خايفة لا خديها سنة عادية جدا وربنا يعينك
وشكرا على كلامك
احمد الشاعر
نابيل
اهلا بيك وانشاء الله انا جايلك بس ادينى يومين معلش عشان مشغول
احمد الشاعر
كيارا
يازميلة القسم ولا لأ خلاص بقى اللى على على انا مش بقر انا بحسد بس
على فكرة انا حاولت اخلى الموضوع كوميدى عشان يبقى سياسة وكوميديا مش كئابة انتى بقى اللى تفسويتك تعبانة شوية
احمد الشاعر
حسن حنفى
ومين ما يعجبوش كلام سيادته دة كلامه كلام موزون
من بقه كدة على الجون
وكمان بيجيلى نفس الاحساس لما بسمعه على الحقيقة
احمد الشاعر
mk
اهلا بيكى وشكرا اوى على المجاملة اللطيفة دى
احمد الشاعر
ايه يا شاعر الجمال ده بس انا مع راى شمس النهار هههههه ابدأ اختار مكان منهم عشان تنمى فيه موهبتك ...وبعد الشر عليك طبعا ربنا يبارك فى حياتك ومستقبلك
.......
ومع راى مصطفى فعلا محتاجه تضبيط شويه بس انتا فعلا موهوب وتستحق الاهتمام والرعايه الادبيه فى بداية طريقك اكيد هتبقى شاعر مهم
..........
وانا اسفه يا احمد قوى على التاخير
mostafa ryan
اهلا بيك والله يا مصطفى الشعر الحديث حرر نفسه من الوزن والكلام دة خلاص بقى ممكن يشبه النثر او شعر بدون وزن او شعر بوزن الشعر الحديث براحتك فيه خالص وخلاص ما بقاش فيه كلاسيكية زى زمان
اما عن نجم انا عمرى ما كنت نسخة من حد لان دة شىء مستحيل عمر ما انا اقدر اكون فلان بالذات لو معرفش ابعاد شخصيته فما اكتبه هو انا
اما عن احلامى اة نفسى اكون زى نجم دة كل اللى احب اوصله شعريا مش اكتر من كدة هو دة فعلا سقف احلامى لكن الحلم العام اللى يخص الشهادة او مستقبلى فهو دة اللى مالوش فعلا سقف
اشكرك
احمد الشاعر
mahasen saber
اهلا بيكى من غير اسف ولا حاجة وانا اى مكان وخلاص اروحه اية المشكلة ثمن الحرية غالى اما بالنسبة للوزن انا قلت فى تعليقى لمصطفى ان الشعر الحديث اتحرر من الاوزان
احمد الشاعر
ههههههههه
يا شاعر يا متألق
دائما مبدع كده
ايه يا عم بالراحه علي سيادته
جمده اوي يااحمد
وخصوصا الحته بتاعت المعونه والحدود
ههههههههههههههههه
بجد انت فنان كبير اوي اوي
لك كل تقديري
تحياتي
بطلت اعرف انت شو بدك ؟؟؟
يوم سياسي يوم كوميدي يوم رومنسي
شخصيتك دامجه كل شي
ومن هاي القصيدة الظاهر انك ناوي تدهور حالك
قصيدة سياسي ضاحكة مفهمتش كتير كل الحكي بس فهمت انك بتكره الحكومة لدرجة كبيرة كتير او بتكرة تعاملها مع عامة الشعب وانتبة عامة مو اسياد
مو بس من هاي القصيدة ومن كل قصائدك
تعرف الظاهر الكره معي ومعك كمان
انا بكره الحياة وانت بتكره الحكومة في تشابه بكلمة كره لا غير
*********************
بالمناسبة بتمنى تكتب بشي بفرح ولو لمرة واحدة لاني حابي شوف كتابتك بالطعم الفرح مو المر
**********************
تقبل مرور عابرة واتمنى ان يكون ما قلته صحيح
ابين زين ابين وهنروح فى خبر كان هههههههه
برده مش ناوى تجبها لبر يابنى بلاش بدال منجى نزورك ورا الشمس
بس على فكرة ضحكتنى اكتر من الضحك اللى ضحكته على البوست بتاعى ههههههه
واقع مؤلم لازم اضحك
تحياتى
هي كويسة..
بس يا ريت تراجع الموسيقى الداخلية ..
يعني اقرا الحاجات كدة
هتلاقي في الوسط جمل اطول من التانية
و دة مخليها موسيقيا مش مظبوطة
:)
تمنياتي بالتوفيق ..
تحية خالصة .
أحمد...
أسفه جداً على التأخير...بس والله مش بإيدي...
__________________________
حلو أوي الموضوع... فعلا حسحس حاول يعمل حاجه في المره الأخيره... لأن الامريكان كل مابذل الواحد نفسه ليهم بيطموعوا بذل أكثر... ويبدو إن صاحبنا إنتبه متأخر جداً على الحكايه ده... وقالك خليني أتحرر من تسلهطم عليّ... بس على ميـــــــــــــن؟ بعمد ما الفاس وقع في الراس...؟ محدش يقدر يتمرد ولا يتحرر من العم سام...
رائع البوست يا أحمد ...
سيبك من دي
لكن ايه ياابني الابداع اللي في ديانة مصرية ده
بجد عجبتني جدا
وفكرتها جديده والقائها جميل
بجد بحييك من قلبي
وعلى فكرة احنا بنشترك احنا الاتنين في المثل الاعلى انا برضه من عشاق الفاجومي احمد فؤاد
اول زيارة ومعتقدش هتكون الاخيرة
تحياتي
اخبار ياشاعر تسمحلى اكون صديق جديد على مدونتك
قصيدة جميلة جدا جدا بس خلى بابك على نفسك
تحياتى
شخابيط mahgoub
كلام قوي
شعر لطيف
وخفيف الظل
بس ايه نعمل ف ناس راح سمعها
وبصرها ضاع
ووجعنا زاد بسبب ارفهم
ربنا يستر علينا جميعاً
.............
بقى بذمتك الكلام لا يعبر عن رأى كاتبه ؟ , ليه ؟ بيعبر عن رأى خالتى مثلا . ( و ان كان رأيها لا يختلف كثيرا (
جدع يا أحمد , عجبتنى
أما بالنسبة "لغاندى" , يا قاتل يا مقتول
ههههه
سلام
ابين زين ابين وابص فى الفنجان
من كتر قسى الشعب الغلبان اتملى الفنجان
اتملى قسية وحرمان وأهات ملية المكان
دموع وجروح والالام ملهاش حدود
شعب غلبان دايما مليان بالهم دايما تعبان
وهنعمل ايه سيته بيحاول يعدل الميزان
ميزان بس مش عادل يطوح فى الانسان
ميزان ظلمه بقى مالى المكان
بس هنعمل ايه والفنجان بقى على الخر
مليان
وابين زين ابين وكفاية املى الفنجان
الله عليك يا شاعر
بس شكلنا كدا هنكون فى الفنجان
هههههههههههههههههههه
smilyrose
روح الحب الصادق
هههه لا سمح الله مش غلطان ولا حاجه .. خلاص صدقنا انك غلبان ...
خالد فودة
منورنى على فكرة سيادته دة حبيبى
احمد الشاعر
صديقى العزيز
كلمات فى الصميم
تحياتى
عماد الدين يوسف
والله دابما بفرح لما بلاقى اسمك فى التعليقات
وبعدين لما انا فنان تبقى انت اية يا عمدة اكيد تبقى استذنا
احمد الشاعر
عابرة
اهلا بيكى انا كل دة الشاعر لازم يكون كل حاجة بس من حقه انه يميل لشىء معين هو حسه
اما عن القصيدة دى فهى سياسى كوميدى على طراز الكوميديا الالهية لو تسمعى عنها اما عن انك ما فهمتى منها كتير دة ممكن لان الجزء الاول ماحدش حيفهم الا لو كان مصرى وعارف نظام الاعتقالات فى مصر
اما الجزء التانى من القصيدة فهو عن رفح ودة سهل فهمه وعلى فكرة الكلام دة حصل فعلا
اما عن الكرة انا عمرى ما كرهت الحكومة ولا بهاجم عشان اكره لو انا كرهتها يبقى انا حتى لو الحكومة انصلح حالها ابقى انا مش عايزها بالعكس انا كل دة من حبى لمصر لو الحكومة انصلحت خلاص ما فيش مشكلة لانى مش كارها بل بحب بلدى
ان شاء الله تشوفى طعم الفرح على ايدى قريب
وقدرى انتى بقى انتى صح ولا
احمد الشاعر
princces
اهلا بيكى منورانى
اضحكى ما حدش واخد منها حاجة
بس انا كل خوفى لا يسلطو عليا كلب هههههههههه
احمد الشاعر
قهوة بالفينليا
اهلا بحضرتك
ممكن تكون اللى انتى قولتيه صح بالنسبة لقرأتك والكتابة هنا على فكرة انا عندى بكون مظبتها وزن والقاء فا ممكن حضرتك ما تعرفيش تقولى الالقاء اللى انا عايزه هى دى الفكرة
احمد الشاعر
اكون او لا اكون
ولا يهمك المدونة مدونتك يعنى انتى عمرك ما تأخرتى عنها
وزى ما انتى قلتى كويس ان انتى حاسة بالى انا عايز اقوله
احمد الشاعر
white heart
اهلا بيك الحمد لله ان ديانة مصرية عجبتك اما عن الفاجومى كويس انى لقيت حد بيحبه معايا
احمد الشاعر
شخابيط محجوب
اهلا بيك وانت اكيد اخ وصديق وانا قافل بابى كويس
احمد الشاعر
البحث عن الذات
اهلا بيك وشكرا على كلامك اللطيف ليا
احمد الشاعر
سارة نجاتى
اهلا بيكى على فكرة انتى قرأى غلط لا يعبر الا الا الا عن رأى صاحبه اللى هو انا يعنى بخلى مسؤليتكم انتم لو حصل حاجة
اما عن غندى حديدى مكان وميعاد المناقشة وانا على احر من الجمر وحقنعك يعنى حقنعك انتى فى ملعبى
احمد الشاعر
smilyrose
اهلا بيكى اية دة انا كدة اضمك مع الفريق انا كاتب برة انه لايعبر الا عن رايى كدة انتى معايا يعنى لو حصل حاجة حفتن عليكى
ابدعتى معى
احمد الشاعر
قلب شاعرة
هو دة القرار اللى انا كنت مستنيه
منورانى والله
احمد الشاعر
الازهرى
اهلا بيك زشكرا لكلامك ليا
احمد الشاعر
توقعت هذه الاجابة من شخص يعشق وطنه
هيا ايها الشاعر اريني ما لديك في القصيدة القادمة
الحكاية لا محتاجة مكان و لا ميعاد , اكتب بوست عن الموضوع ده , بس عشان مابقاش فى ملعبك يا ناصح . سلام
تصدق أنا علقت أول ما نزلت البوست ده بس عماله أدور مش لاقياه والله الوصله دي هتجنني
المهم هعيد الكلام
إنت بتجيب الكلام ده منين
هو صح يودي في ... إحم
بس روعه يا شاعر
تحياتي ليك
جميله اوي
عجبتني بجد
عابرة
من عنية.... المرة الجاية
بس اأمرينى....وانتى تلاقينى
فى ايدك قلم......او محبرة
احمد الشاعر
سارة نجاتى
حاضر من عنيا انا حنزله موضوع بس شعر ولو ما وفاش كل التساؤلات امرى لله حكتبه موضوع ونزله على المدونة التانية فجر التاريخ مع انى ما كنتش عايز ابتديها مع شخصية زى دى
وعلى فكرة انتى كدة كدة فى ملعبى وضامن النتيجة6\0 ليا
احمد الشاعر
نيجار
اهلا بيكى انتى تعلقى فى اى وقت احنا تحت امر المديرية كلها
هههههههه
اما بقى عن الكلام دة بجيبو من عن خالتى
هههههههه
بهزر طبعا الكلام دة الحمد لله هذا من فضل ربى دة اللى اقدر اقوله
احمد الشاعر
esraa
اهلا بيكى منورانى والله والحمد لله انها عجبتك
احمد الشاعر
السلام عليكم
اقولك الصراحه
اول ما دخلت المدونة ولقيت الصور اللى فى الجنب دى كنت فاكراك هتديها سياسه
وانا بصراحه مش بحبها نهاااااااااائى
واقولك حاجه كمان
انا فرحانه ان مدونتك القديمة اتمسحت
ههههههههههههههههههههههههههه
والله مش علشان حاجه وحشه
علشان اتابعك من الاول بس
ههههههههههههههههههه
شفت بقى حظى حلو ازاى
وبجد البوس اللى قبل ده جبار ماشاء الله
اسلوبك جميييييل اوى وحباه
ربنا يوفقك يارب
ان شاء الله هكون عندك على طووووووول
البوست اللى فات
ديانة مصريه جميل جميل بجد
تحياتى
قصيدة تودى ورا الشمس ومااجملها من حرية هناك بقى
ربنا يحفظك وننتظر دوما المزيد
ايه يا عم احمد التخبيط دا انت اكيد الموتور معاك فيه شنبر مكسور ولا حاجه
معلش متفهمش كلامى غلط دلا كلو كدا هزار معلش
بس انا اتصدمت حقيقتا من الاخوان الفاشيون ايه دى هجوم على الاخوان ولا ايه بالزبط يا ريت توضح لى علشان حصل عندى لبس جامد انا دايما بهجم على الاخوان بس مش بالطريقه دى يعنى على اللى فهمتوا انك بتشبهم بالفاشيين الشيوعيين الكفار طب ازاى وهم مسلمون معلش يمكن انا فهمت غلط اتمنى ذالك معلش تقبل كلامى بصدر رحب
تحياتى
يا نهار أبيض عليك اما حتت قصيده
بس كانت عايزه شوية تظبيط يا أحمد
علشان تبقى ملهاش مثيل
انت كتبتها بسرعه ولا ايه
مضمونها جميل وتهلك من الضحك
مهو هم يبكى وهم يضحك
يلا ربنا يوفقك في تقدم مستمر
خالص تحياتى وأحترامى ليك
Post a Comment